Alataý qalasynda eki bıýdjet bolady, odan respýblıkalyq qazynaǵa qarjy alynbaıdy — jańa zań jobasy
ASTANA. KAZINFORM — Alataý qalasynyń bıýdjetinen respýblıkalyq bıýdjetke qarajat alýǵa tyıym salynady. Bul týraly QR Parlamenti Májilisiniń depýtaty Nurtaı Sabılıanov Jibek joly telearnasynyń JJ Studio baǵdarlamasyna bergen suhbatynda aıtty.
— «Alataý qalasynyń mártebesi týraly» konstıtýtsııalyq zań jobasy Prezıdenttiń tapsyrmasy boıynsha ázirlendi. Parlament Májilisi jumysqa qabyldady. Endi osy zań jobasy boıynsha jumystar atqarylady. Arnaıy parlamenttik komıssııa qurylady. Sol arqyly barlyq usynystar jan-jaqty qaralady. Zańnyń basty maqsaty Alataý qalasyn ekonomıkalyq jáne tehnologııalyq turǵydan damytý. Osyǵan baılanysty zańda arnaıy rejımder bar. Mysaly Alataý qalasyn basqarý boıynsha keńes qurylady. Ol keńesti Úkimet basshysy basqarady. Sol alqaly keńestiń sheshimimen ákimshilik erejesi de bekitilip, Alataý qalasynyń damýy aıqyndalady. Qandaı ınvestıtsııalar tartý, qandaı tıisti sheshimderdi qabyldaý týraly máselelerdi anyqtaıdy. Ǵylym men tehnıkanyń ozyq jetistikterin qoldaný, jańa ınnovatsııalardy engizý, jańa tásilder men tájirıbelerdi engizý qarastyrylady, — deıdi depýtat.
Májilismen basqarý júıesinde keńespen birge ákimdik jáne máslıhat bolatynyn jetkizdi. Al qala 2 bıýdjet arqyly qarjylandyrylady eken.
— Taǵy atap aıtatyn másele, qalany damytý úshin 2 bıýdjet bolady. Áýeli Qazaqstan zańnamasyna sáıkes jergilikti bıýdjet qalyptasady. Ony bekitetin — Máslıhat. Sonymen birge arnaıy memlekettik «Alatau City» degen qor qurylady. Ol qordyń ózindik bıýdjeti bolady. Qorǵa túsetin qarajat kózderi qarastyrylǵan. Qordyń jumysy tek Alataý qalasyn damytýǵa baǵyttalady. Korporatıvtik tabys salyǵy, qosymsha qun salyǵy syndy ózge de salyqtar osy qordyń bıýdjetine túsedi. Al jergilikti bıýdjetke kólik salyǵy, áleýmettik salyq, jeke tabys salyǵy túsedi jáne osy eki bıýdjet te respýblıkalyq bıýdjetten qosymsha qarjylandyrylady. Osy tusta taǵy bir erekshelik bar. Alataý qalasynyń bıýdjetinen respýblıkalyq bıýdjetke qarajat alýǵa tyıym salynady. Demek, barlyq qarajat Alataý qalasyn damytýǵa jumsalady, — deıdi Sabılıanov.
Bul aldaǵy 30 jylǵa arnalǵan Alataý qalasyn damytý jospary. Depýtat jospardyń basty maqsaty — Alataý qalasy arqyly el damýyn qamtamasyz etý dep túsindirdi.
Al ozyq tehnologııaly, ınnovatsııalyq qalaǵa ákim bolatyn qyzmetker bilikti maman bolý kerek.
— Joǵaryda aıtqanymdaı qalany basqarý boıynsha arnaıy keńes qurylady. Keńestiń quramy men onyń erejesin QR Prezıdenti bekitedi. Qalaǵa ákim bolatyn qyzmetker jan-jaqty bilimi men tájirıbesine, halyqaralyq uıymdarda, basqa memleketterdegi jumys ótiline qaraı tańdalady dep oılaımyn. Onda kádimgideı ákimdik bolady. Ákimi de Qazaqstan zańnamasyna saı taǵaıyndalady. Al Alataý qalasynyń ózi Almaty oblysynyń quramynda bolady. Ákim mindetti túrde ІT mamany bolý kerek degen shart joq. Bastysy tájirıbesi bar, qalanyń damýyna atsalysa alatyn, uıymdastyrýshylyq qabileti bar, jigeri bar azamattar jumys isteý kerek, — dep tolyqtyrdy spıker.
Májilis depýtaty «Alataý qalasynyń arnaýly mártebesi týraly» Konstıtýtsııalyq zań jobasy bıyl kúshine enetinin málimdedi.
— Qazir qalanyń 30 jylǵa arnalǵan jospary daıyndalyp jatyr. Al «Alataý qalasynyń mártebesi týraly» zań jobasyn 2-3 aıdyń kóleminde talqylap, qabyldaımyz. Qabyldanǵannan keıin, bıyldan bastap bul zań qoldanysqa engiziledi. Qazirdiń ózinde qalada ákimshilik bar, qala jumys istep tur. Ol jaqta turǵyn úı salý, nysandardy jańartý, tsıfrlyq júıege qatysty jańa sheshimderdi qabyldaý syndy kóptegen máseleler bar. Ákimdik osynyń bárin bir júıege keltirýmen aınalysady, — dep túıindedi stýdııa qonaǵy.
Aıta keteıik, birneshe kún buryn Parlament Májilisi «Alataý qalasynyń arnaýly mártebesi týraly» Konstıtýtsııalyq zańynyń jobasyn talqylaýǵa qabyldady.