Alataý qalasynda bıyl 10 ınvestıtsııalyq jobanyń qurylysy bastalady

QONAEV. KAZINFORM – Alataý qalasynyń bıýdjeti byltyr 2,4 mlrd teńge bolǵan jáne onyń 96,9% ıgerilgen. Al bıyl qala qajettilikterine jumsalatyn qarajat 4,4 mlrd teńge mólsherinde bekitildi.

Bul týraly Almaty oblysynyń Óńirlik kommýnıkatsııalar qyzmetiniń alańynda ótken brıfıng barysynda Alataý qalasynyń ákimi Árken Ótenov málim etti.

Aıta keteıik, brıfıng barysynda jańadan qurylǵan qala ákimi shahardyń 2024 jylǵy áleýmettik-ekonomıkalyq damý qarqyny týraly baıandady.

- Alataý qalasynyń 2025 jylǵa arnalǵan bıýdjeti 4,4 mlrd teńge mólsherinde bekitildi. Onyń ishinde joldar ınfraqurylymyn jetildirýge 819 mln teńge (18,2%), turǵyn úı kommýnaldyq sharýashylyǵyn damytýǵa 1,3 mlrd teńge qarastyrylsa (29,5%), áleýmettik tólemder men qoldaý sharalaryna 400 mln teńge (9,1%) qarajat bólinip otyr, - dedi ol.

Sondaı-aq shahar basshysy Alataý qalasynyń keshendi jáne úılesimdi damýyn qamtamasyz etý úshin QR Premer-mınıstriniń orynbasary Qanat Bozymbaevtyń jetekshiligimen strategııalyq mańyzy bar jobalyq keńse qurylǵanyn atap ótti.

Árken Ótenovtyń aıtýynsha, 2024 jyly negizgi kapıtalǵa tartylǵan ınvestıtsııalar kólemi 46 mlrd teńgege jetti. Al osy jyly qalada 10 iri ınvestıtsııalyq jobanyń qurylysyn bastaý josparlanyp otyr.

Eske salaıyq, buǵan deıin Almaty men Alataý qalasynyń arasynda sýtegimen júretin tikushaq-taksı paıda bolýy múmkin ekenin jazǵanbyz.