Alataý qalasynda alapat órt bolǵan qoqys polıgony jabyldy

QONAEV. KAZINFORM — Alataý qalasy aýmaǵynda ornalasqan turmystyq qaldyqtar polıgonynda 1 aptadaı órt boldy.

Onyń saldarynan qala aýmaǵynda tehnogendik sıpattaǵy tótenshe jaǵdaı rejımi engizilgen bolatyn. Almaty oblysy ekologııa departamenti bul oqıǵadan keıin atalǵan qoqys polıgony jabylýy múmkin ekenin habarlady. 

Kazinform agenttigi bul máseleni naqtylady. Resmı saýalǵa jaýap bergen Almaty oblysynyń turǵyn úı-kommýnaldyq sharýashylyq jáne abattandyrý basqarmasy qazirgi ýaqytta nysan jumysy toqtaǵanyn atap ótti.

— Alataý qalasy aýmaǵyndaǵy qatty turmystyq qaldyqtar polıgonynda bolǵan órtke baılanysty onyń jumysy ýaqytsha toqtatyldy. Órttiń sebebin anyqtaý maqsatynda, tekserý jumystary júrgizilip jatyr, — delingen basqarma jaýabynda.

Sonymen qatar vedomstvo málimetinshe, jyl basynan beri Almaty oblysynda ǵaryshtyq monıtorıng nátıjesinde 145 ruqsatsyz qoqys úıindisi anyqtalǵan. Búginge deıin onyń 123-i joıyldy, bul — 84,8 paıyz.

— Qalǵan 22 ruqsatsyz qoqys úıindisin joıý jumystary júrgizilýde. Qazirgi tańda Ákimshilik quqyq buzý týraly kodekstiń 505-baby boıynsha 19 782 hattama toltyrylyp, jalpy 27,1 mln teńge aıyppul salyndy. Al 434-baptyń 2-bóligi boıynsha 3 399 hattama toltyrylyp, 109,1 mln teńge aıyppul salyndy, — dep habarlady vedomstvo.

Óńirdegi eń eski polıgonǵa 36 jyl bolǵan

Almaty oblysynyń turǵyn úı-kommýnaldyq sharýashylyq jáne abattandyrý basqarmasy óńirdegi ózge qatty turmystyq qaldyqtar polıgondary týraly jaýap berdi.

Jalpy oblysta qoqys tastaýǵa arnalǵan arnaıy 6 oryn belgilengen:

1. Ýaqytsha jabylǵan Alataý qalasyndaǵy turmystyq qaldyqtar polıgony 2008 jyly paıdalanýǵa berilgen. Aýmaǵy — 34,3 ga.
2. Balqash aýdanynda aýdany 6,55 ga bolatyn polıgon ornalasqan. Ol Balqash aýdany Aqdala aýyldyq okrýgi ákiminiń apparatynyń teńgeriminde. 2014 jyly paıdalanýǵa berilgen nysan jylyna 2800 tonna turmystyq qaldyqtardy qabyldaı alady.
3. Jambyl aýdanyndaǵy polıgon aýmaǵy — 10 ga. Paıdalanýǵa 2008 jyly berilgen, qazir Jambyl aýdanynyń TÚKSh memlekettik mekemesiniń teńgeriminde. Jobalyq qýaty — jylyna 20 000 tonna.
4. Qarasaı aýdanynda óńirdegi eń kóne qoqys polıgony ornalasqan. Nysan 1989 jyldan beri jumys istep keledi. Qazir «KAZ Waste Conversion» JShS-yna jalǵa berilgen. Onda jylyna 523 500 tonna turmystyq qaldyqty tastaýǵa bolady.
5. Talǵar aýdanyndaǵy polıgonnyń menshik ıesi — «EkoServısGrýpp» JShS. Aýdany — 7,4 ga. 2017 jyly paıdalanýǵa berilgen. Jylyna 33 800 tonna turmystyq qaldyqtardy ákelýge jaramdy.
6. Qonaev qalasynyń arnaıy orny «Qonaev Kórkeıtý» mekemesine senimgerlik basqarýǵa berilgen. Jobalyq qýaty — jylyna 50 000–60 000 tonna.

Vedomstvo Qonaev qalasynda ekologııalyq jaǵdaıdy jaqsartý maqsatynda jańa polıgonyn salý jáne qaldyqtardy suryptaý jelisin iske qosý josparlanǵanyn atap ótti.

Qazirgi ýaqytta jobalyq-smetalyq qujattama daıyndalǵan. Jobany iske asyrý 2025–2026 jyldary josparlanyp otyr.

— Jyl saıyn shamamen oblys boıynsha 630 myń tonna qaldyq túziledi, onyń ishinde 182,7 myń tonnasy qaıta óńdeledi, — dep habarlady oblystyq turǵyn úı-kommýnaldyq sharýashylyq jáne abattandyrý basqarmasy.

Eske salaıyq, alapat órtke baılanysty jarııalanǵan Alataý qalasyndaǵy tótenshe jaǵdaı rejımi 1,5 aıdan keıin alynǵan edi.