Alataý qalasynda aerotaksı usha bastady
ASTANA. KAZINFORM — Kólik mınıstrligi Alataý qalasynda ushqyshsyz aerotaksıler synaq rejıminde usha bastaǵanyn aıtty.
— Keshe ushqyshsyz áýe taksıi synaq rejıminde usha bastady. Bul jobany mamyr aıynda iske qosamyz dep aıtqan edik. Sonyń alǵashqy ushýlary júrgizile bastady, — dedi Kólik mınıstri Nurlan Saýranbaev Úkimette otken brıfıngte.
Aerotaksı baǵasyna qatysty mınıstr bul búkil álem úshin jańa ónim ekenin, ázirge naqty qunyn eshkim eseptep bere almaıtynyn atap ótti.
— Qazir 2-4 jolaýshy tasymaldanyp, synaqtan ótip jatyr. Qoný alańdary da salynyp, apparattar satyp alynýda. Ári qaraı jaǵdaıǵa qaraı belgili bolady. Bizge normatıvtik-quqyqtyq aktilerdi Parlamentke engizý jóninde tapsyrma berildi. Parlament bizdi qoldaıdy dep úmittenemiz, — dep tolyqtyrdy mınıstr.
Sonymen birge, Kólik vıtse-mınıstri Talǵat Lastaev aerotaksıdiń tehnıkalyq sıpattamalary týraly aıtyp berdi.
— Bul qytaılyq AutoFlight kompanııasy shyǵarǵan apparat. Onyń tehnıkalyq sıpaty boıynsha ushý radıýsy — 250 shaqyrym. Al eń joǵary jyldamdyǵy — saǵatyna 200 km. Qazirgi ýaqytta Alataýda bul apparat synaq retinde ushyryla bastady, — dedi T. Lastaev.
Sonymen birge, tilshiler Nurlan Saýranbaevtan «Kópten kútken LRT-ǵa minip kórińiz be?» dep surady.
— Jolaýshy retinde miný múmkindigi bolmady, óıtkeni kelgen adamdar óte kóp boldy. Sondyqtan sál keıinirek baryp kóremin, — dedi Kólik mınıstri.
Aıta keteıik, avıatsııalyq qaýipsizdik boıynsha Qazaqstan álemdegi úzdik 20 eldiń qataryna endi.
