Alataý qalasynda 73 mlrd teńgege kólik-logıstıka ortalyǵy salynady
QONAEV. KAZINFORM — QAZAQ INVEST 2025 halyqaralyq forýmynda Almaty oblysynyń strategııalyq bastamalary tanystyryldy.
Almaty oblysy ákiminiń orynbasary Rýstam Isataev Alataý qalasyn damytýdyń aldaǵy josparymen bólisti. Onyń aıtýynsha, osy jyldyń sońyna deıin Alataýda eki iri joba júzege asyrylady. Olar: ınvestıtsııa kólemi 10 mlrd teńge bolatyn ındýstrııalyq parktiń ekinshi kezeńin iske qosý (jańa 20 myń sharshy metr qoıma alańdary) jáne 73,3 mlrd teńge kólemindegi kólik-logıstıka ortalyǵyn salý.
— Alataý qalasynda Shenchjen úlgisinde arnaıy ekonomıkalyq aımaq qurylǵan. Biz ınvestorlarǵa daıyn ınfraqurylym, salyqtyq jáne ákimshilik jeńildikter, sondaı-aq halyqaralyq naryqtarǵa tikeleı qoljetimdilik usynamyz, — dedi Rýstam Isataev.
Eske salaıyq, Almatydan soltústikke qaraı 47 shaqyrym jerde ornalasqan Jetigen aýyly oblystyq mańyzy bar Alataý qalasyna aınalǵan bolatyn.
Buǵan deıin jańadan qurylǵan Alataý qalasynyń damý baǵyty týraly jazǵan edik.
Sondaı-aq Premer-mınıstrdiń orynbasary Qanat Bozymbaev Alataý qalasyna aıryqsha mártebe beriletinin aıtty.