Alataý qalasynda 1,8 trln teńgelik 44 ınvestıtsııalyq joba iske asyrylmaq
ASTANA. KAZINFORM — Prezıdent tapsyrmalaryn júzege asyrý aıasynda Premer-mınıstr Oljas Bektenovtiń tóraǵalyǵymen Alataý qalasyn damytý jónindegi keńestiń otyrysy ótti. Bul týraly Úkimettiń baspasóz qyzmeti habarlady.
Jıynda ınvestıtsııalyq jobalardyń oryndalý barysy, ınfraqurylymdyq qamtamasyz etý boıynsha jumys qarqyny, sondaı-aq quqyqtyq ekojúıge qatysty máseleler jáne sapaly adamı kapıtaldy qalyptastyrý tásilderi talqylandy.
Otyrysty ashqan Premer-mınıstr Prezıdenttiń Alatau City-di damytýǵa erekshe kóńil bólip otyrǵanyn atap ótti.
— Memleket basshysy Alataý qalasyn uzaqmerzimdi ekonomıkalyq damýdyń jańa ortalyǵy retinde belgilep, jumys barysyn tikeleı ózi qadaǵalap otyr.
Sonymen qatar jańa Konstıtýtsııa jobasynda qala damýynyń negizgi qaǵıdattary da qamtyldy. Elimizde arnaıy quqyqtyq rejımderdiń paıda bolýy Qazaqstannyń uzaqmerzimdi ekonomıkalyq múddelerine saı ári ınvestıtsııa tartýǵa jańa múmkindikter ashady.
Alataý qalasyn damytý — bul erekshe mártebege ıe, jedeldetilgen damýdyń zamanaýı tsıfrlyq qalasyn qurýǵa baǵyttalǵan ınnovatsııalyq sheshim, — dep atap ótti Oljas Bektenov.
Bul rette elimizde arnaıy quqyqtyq rejımderdiń paıda bolýy eldiń ákimshilik-aýmaqtyq qurylymyna áser etpeıtini basa aıtyldy. Aýmaqtyń turaqtylyq prıntsıpi saqtalady ári mańyzdy bolyp qala beredi, bul onyń jańa Konstıtýtsııa jobasynyń birinshi bóliminde — «Konstıtýtsııalyq qurylym negizderinde» bekitilýimen dáleldenedi.
Premer-mınıstrdiń orynbasary Qanat Bozymbaev Alataý qalasyn damytý baǵytynda atqarylyp jatqan jumystar týraly baıandady. Qazirgi ýaqytta Parlamentte «Alataý qalasynyń arnaýly mártebesi týraly» Konstıtýtsııalyq zań jobasy qaralýda.
Instıtýtsıonaldyq baza qurýmen qatar ınvestorlar úshin tartymdy orta qalyptastyratyn jáne qala ekonomıkasynyń ósýine jańa serpin beretin júıe quraýshy jobalardy iske qosý boıynsha praktıkalyq jumys júrgizilýde. Basym baǵyttar qatarynda qalanyń sáýlettik-iskerlik ózegi retinde Iconic Complex kópfýnktsıonaldy keshenin jáne joǵary bilikti mamandar daıarlaıtyn ári ozyq tehnologııalardy damytý ortalyǵy retinde KAIST Kazakhstan tehnologııalyq ýnıversıtetin salý jobalary bar.
Jalpy ınvestıtsııalyq portfel ónerkásip, logıstıka, agroóńdeý, qyzmet kórsetý jáne kreatıvti ındýstrııa salalaryndaǵy jalpy kólemi shamamen 1,8 trln teńge bolatyn 44 jobadan turady. Olardy júzege asyrý 30 myńnan astam jumys ornyn ashýǵa jáne Alatau City turaqty ekonomıkalyq orta qalyptastyrýǵa múmkindik beredi.
Injenerlik jáne kólik ınfraqurylymyn damytýǵa basa nazar aýdaryldy. Birqatar baǵyt boıynsha jobalar kezeń-kezeńimen júzege asyrylýda:
energııamen qamtamasyz etý — «Arna» qosalqy stansasynyń qurylysy 220/110 kV, 6 qosalqy stansany jobalaý;
sýmen jabdyqtaý jáne sý burý — «Yntymaq» sý toǵanynyń qýatyn keńeıtý, úsh sý toǵanynyń qurylysy, aǵyn sýdy tazartý stansasy jáne sý taratýshy kollektorlar salý;
gazben qamtý — «Gate City-1» jańa avtomattandyrylǵan gaz taratý stansasynyń (AGTS) qurylysyn jobalaý, Jetigen AGTS qurylysyn aıaqtaý;
jol ınfraqurylymy — Growing jáne Gate District-ke jol ótpesin salý boıynsha qujattama ázirlenýde jáne EPC-F kelisimsharttary sheńberinde Golden District-te jol ótpesin jáne ınjenerlik jelileri bar jol salý kózdelgen.
Alatau City Authority memlekettik qorynyń bas atqarýshy dırektory mindetin atqarýshy Álisher Ábdiqadyrov Alataý qalasyn damytý boıynsha tujyrymdamalyq jáne qala qurylysy josparlary, damý strategııasy sııaqty irgeli qujattardyń ázirlengeni týraly baıandady.
Tujyrymdamalyq jospardy engizý qalanyń strategııalyq jáne keńistiktik damýyn aıqyndaıdy. Qala qurylysy jospary men damý strategııasy aımaqtarǵa bólýdi jáne qurylys parametrlerin, sondaı-aq turǵyn úıdiń ómir súrý ortasynyń sapasyna qoıylatyn talaptardy, onyń ishinde ǵımarattardyń bıiktigi boıynsha shekteýlerdi, kógaldandyrý jáne abattandyrý normalaryn, aýmaqtyń jeldetilýin jáne jeke kólikter men avtoturaqtardyń qoljetimdiligin qamtamasyz etedi. Damý strategııasy salalyq aktiler men ınvestıtsııalyq jospardy bekitýge, sondaı-aq Alataý qalasynyń jedel damýyn qamtamasyz etý úshin preferentsııalar berýge negiz bolady.
Sapaly adamı kapıtaldy qalyptastyrý tásilderi jeke qarastyryldy. Shenchjen, Dýbaı jáne Sıngapýrdyń tabysty tájirıbesin eskere otyryp, Alataýda adamı kapıtaldy qalyptastyrýdyń kezeńdik modeli usynylady. Bul model sapa basymdyǵy bar eńbek resýrstarynyń basqarylatyn jáne selektıvti aǵyny prıntsıpterine negizdelgen.
Negizgi baǵdarlardyń qatarynda kóshi-qon saıasatyn ekonomıkanyń qajettilikterimen baılanystyrý, jumyspen qamtýdy ınstıtýtsıonaldyq retteý jáne el ishinde daǵdylar men quzyretterdi júıeli jańǵyrtý esebinen eńbek naryǵynyń joǵary bilikti jáne basqarýshylyq segmentterindegi qazaqstandyq mamandardyń barynsha joǵary úlesin qamtamasyz etý úshin jaǵdaılar jasaý kórsetilgen.
Otyrys qorytyndysy boıynsha keńeske qatysýshylar Alataý qalasyn damytý boıynsha usynylǵan tásilder men jumys baǵyttaryn qoldady. Qalanyń ekojúıesin tolyqqandy qalyptastyrý úshin derbes aktilerdi ázirleý basym mindet bolyp sanalatyny atap ótildi.
Osy jumysty úılestirý jáne súıemeldeý maqsatynda qajetti máselelerdi ýaqtyly qarap ári jedel sheshimder qabyldaý úshin Jedel komıtet quryldy.
Barlyq normatıvtik aktilerdi ázirleý olardyń ınvestorlar úshin aıqyndylyǵy men ashyqtyǵyna baǵdarlanýy tıis ekendigi atap ótildi. Osyǵan baılanysty Alataý aktilerin ázirleýge jáne saraptaýǵa otandyq sarapshylarmen qatar halyqaralyq uıymdardyń ókilderin tartý tapsyryldy.
Premer-mınıstr tabysty proaktıvti ınvestıtsııalyq saıasatty júrgizý úshin ınjenerlik ınfraqurylymdy, ásirese iri zákirlik jobalardy qarqyndy damytý talap etiletinin atap ótti. Alataý qalasynyń ınjenerlik ınfraqurylymyn damytý máseleleri boıynsha mınıstrlikterge Almaty oblysynyń ákimdigimen birlesip birqatar tapsyrma berildi.
Sondaı-aq uıymdastyrýshylyq jáne qarjylyq sıpattaǵy birqatar sheshim qabyldandy.
Aıta ketelik elimizde óńdeý ónerkásibidegi ósim men ınvestıtsııalyq belsendilik artqan edi.