Alataý qalasynan 10 sotyq tegin jer alýǵa bola ma
QONAEV. KAZINFORM — Alataý qalasynyń aýmaǵynan jeke turǵyn úı qurylysyna arnalǵan jer telimderi bólinedi me? Bul suraqqa Almaty oblysy jer qatynastary basqarmasynyń basshysy Amanjol Abdrahmanov jaýap berdi.
Vedomstvo basshysynyń aıtýynsha, búginde Almaty oblysynda 1 442 700 azamat jeke turǵyn úı qurylysy úshin jer ýchaskelerin alýǵa kezekte tur. Al keıingi 3 jyl ishinde oblys turǵyndaryna 1002 jer ýchaskesi berilgen.
— Almaty oblysynda jeke turǵyn úı qurylysyna arnalǵan jer ýchaskelerin berý qarqyny áli de shekteýli deńgeıde qalyp otyr. Sońǵy 3 jylda oblys turǵyndaryna 1002 jer ýchaskesi berilgen. Bul jylyna orta eseppen 334 jer ýchaskesi. Sonymen qatar 2025-2026 jyldary qosymsha 295 jer ýchaskesi berildi, — dedi Amanjol Abdrahmanov agenttik saýalyna bergen jaýabynda.
Ol beriletin tegin jer telimderin daıyndaýda negizgi basymdyq qala mańyndaǵy jáne jańadan qalyptasyp jatqan turǵyn úı alqaptarynda ınjenerlik ınfraqurylymdy damytýǵa, onyń ishinde avtomobıl joldaryn salýǵa, elektrmen jabdyqtaý jelilerin tartýǵa, sýmen jabdyqtaý júıelerin júrgizýge jáne gazdandyrýǵa baǵyttalǵanyn atap ótti.
Sonymen qatar jer qatynastary basqarmasynyń basshysy Alataý qalasynyń aýmaǵynan jer ýchaskeleriniń berilýi týraly túsinikteme berdi.
— Qazirgi ýaqytta Alataý qalasynyń aýmaǵynda azamattarǵa jeke turǵyn úı qurylysy úshin óteýsiz negizde 10 sotyq jer ýchaskeleri berilmegen. Sonymen qatar aldaǵy ýaqytta Alataý qalasynyń aýmaǵynda jeke turǵyn úı qurylysy úshin jer ýchaskelerin berý josparlanbaıdy, — dedi ol.
Eske salaıyq, buǵan deıin Almatyda tegin 10 sotyq jer berý toqtatylǵanyn jazǵanbyz.
