Alataý qalasyn salýǵa qarajat qaıdan alynady

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Nurlan Baıbazarov Májilistiń jalpy otyrysynan keıin Alataý qalasy qandaı qarajatqa salynatynyn aıtty.

Mınıstrdiń aıtýynsha, Alataý qalasyndaǵy qurylysqa Túrkistanǵa ınvestıtsııa tartý tásilimen aqsha tartylmaq. 

— Qala bıýdjet aqshasyna salynbaıtyny túsinikti. Bul aqylǵa qonymsyz bolar edi. Biz ol jerde arnaıy ekonomıkalyq aımaqtar quramyz. Jalpy qalanyń ózin arnaıy ekonomıkalyq aımaq dep aıtýǵa bolady. Alataý qalasy osy qaǵıdatpen salynady, — dedi ol jýrnalıst suraǵyna bergen jaýapta.

Bul qala bıýdjet aqshasy tek memlekettik organdardyń jumysyn uıymdastyryp, ǵımarattaryn kútip ustaýǵa jumsalmaq. 

— Jalpy qalalyq ınfraqurylym degen bar. Ol da ishinara bıýdjetten qarjylandyrylady. Qazir búkil óńirlerde sondaı tásil jolǵa qoıylǵan. Árıne, bıýdjet aqshasyna qonaı úı salyp, meıramhana ashpaımyz. Ony bıznes isteý kerek. Sol úshin erekshe jaǵdaı jasalyp, jeńildikter beriledi, — dedi Nurlan Baıbazarov.

Vıtse-premer qurylys endi bastalǵandyqtan Alataýdyń tolyq qala retinde qalyptasýyna qansha qarajat ketetinin dóp basyp aıtý múmkin emestigin atap ótti.

Buǵan deıin habarlaǵanymyzdaı, bıyl Májiliske úsh zań taza qazaq tilinde ázirlenip túskeni málim boldy.