Alataý qalasyn damytatyn strategııalyq qujattar qashan qabyldanady — Bozymbaev jaýaby
ASTANA. KAZINFORM — Alataý qalasyn damytýǵa baǵyttalǵan úsh strategııalyq qujat 2026 jyldyń sońyna deıin bekitilmek. Bul týraly Quryltaı depýtattarynyń saýalyna Premer-mınıstrdiń orynbasary Qanat Bozymbaevtyń jaýabynda aıtylǵan.
Vıtse-premerdiń aıtýynsha, «Alataý qalasynyń arnaýly quqyqtyq rejımi týraly» Konstıtýtsııalyq zańnyń 28-babynda qalanyń mynadaı úsh strategııalyq qujaty aıqyndalǵan:
— 30 jylǵa arnalǵan uzaq merzimdi damý jospary;
— 15 jylǵa arnalǵan master-jospar;
— 15 jylǵa arnalǵan damý strategııasy.
— Master-jospar men Damý strategııasy Uzaq merzimdi damý josparynyń negizinde jáne onyń aıasynda birge ázirlenedi. Barlyq qujatty Alataý qalasynyń keńesi bekitedi. Memleket basshysynyń tapsyrmasyna sáıkes barlyq úsh qujat 2026 jyldyń sońyna deıin bekitilýge tıis. Uzaq merzimdi damý josparyn bekitý aǵymdaǵy jyldyń qazan aıyna josparlanǵan. Strategııalyq baǵdarlardyń sabaqtastyǵyn qamtamasyz etý maqsatynda Uzaq merzimdi damý josparyna 10 jylda bir retten jıi emes, al Master-jospar men Damý strategııasyna 5 jylda bir retten jıi emes túzetýler engizilýi múmkin, — dedi ol.
Qanat Bozymbaevtyń atap ótýinshe, strategııalyq qujattarda kórsetkishter júıesi qalyptastyrylady. Ol ekonomıkalyq jáne ınvestıtsııalyq damýmen qatar qalalyq ortanyń sapa standarttaryn, ınjenerlik, kólik jáne áleýmettik ınfraqurylymnyń qoljetimdiligin, memlekettik qyzmetterdiń sapasy men qoljetimdiligin, tsıfrlandyrý men ekologııalyq ornyqtylyqty, sondaı-aq halyqtyń ómir súrý sapasyna áser etetin ózge de parametrlerdi qamtıdy.
— Infraqurylymnyń uzaq merzimdi damýy Master-jospardyń quramyndaǵy Infraqurylymdyq josparda bekitiledi. Atalǵan jospar kólik, ınjenerlik, kommýnaldyq, áleýmettik, tsıfrlyq jáne ózge de ınfraqurylym obektileriniń tizbesin, ornalasýyn jáne damý kezektiligin aıqyndaıdy, — dedi Úkimet basshysynyń orynbasary.
Buǵan deıin Quryltaı depýtaty Alataý qalasy turǵyndarynyń basty problemalaryn ataǵan edi.
