Alataý qalasy mamandary úshin ıpotekalyq kredıt berý lımıtin ulǵaıtý usynyldy
ASTANA. KAZINFORM — Qanat Bozymbaev Alataý aýdanyn damytý máseleleri boıynsha Jobalaý keńsesiniń otyrysyn ótkizdi jáne kásipkerlermen kezdesti, dep habarlaıdy Úkimettiń baspasóz qyzmeti.
Búgingi tańda Alataýda týrızm, logıstıka, ónerkásip, bilim berý jáne bıznes salalarynda 11 joba ázirlenýde.
Qala aýmaǵynda iri ınvestıtsııalyq jobalar josparlanǵan jáne olardy ornalastyrý boıynsha aldyn ala kelisimder ınjenerlik qurylystar men qorǵanys aımaqtaryn eskere otyryp jasalǵan. Sanıtarlyq aımaqtarǵa, óndiristik alańdardy tıimdi paıdalanýǵa jáne qorshaǵan ortaǵa áser etýine baılanysty qalanyń aýmaǵyn josparlaýda túzetýler engizý qarastyrylǵan. Osyǵan baılanysty vıtse-premer bıznes ókilderimen, jobalaý ınstıtýttarymen kezdesip, qalanyń Bas josparyna ózgerister engizý jónindegi usynystardy tyńdady.
— Jańa Alataý qalasyn salý yńǵaıly, qaýipsiz, tehnologııalyq turǵyda damyǵan jáne ekologııalyq taza bolýy kerek. Alataý zamanaýı ýrbanıstik ortalyqtyń úlgisi bola alady. Qala qurylysynyń halyqaralyq standarttarǵa negizdelgen zamanaýı bolýyn qamtamasyz etý qajet. Bir aı ishinde ınvestorlarmen jasalǵan kelisimderge sáıkes qala aýmaǵynda ınvestıtsııalyq jobalardy ornalastyrý máselelerin qaıta qaraýdy tapsyrdym. Barlyq profıldi mınıstrlikter protsesti jedeldetip, mamyr aıyna deıin Bas josparǵa ózgerister engizsin, — dedi Qanat Bozymbaev.
Odan keıin Alataýda Joba keńsesiniń otyrysy ótti, oǵan ulttyq ekonomıka, ádilet, aýyl sharýashylyǵy, kólik, qurylys jáne ınfraqurylym, eńbek jáne halyqty áleýmettik qorǵaý vıtse-mınıstrleri qatysty. Qatysýshylar EPC sharttary men qurylysty salýǵa ketetin qarjylandyrý quraldaryn qoldaný mehanızmderin engizý jumystary týraly esep berdi. Aýyl sharýashylyǵy maqsatyndaǵy jerler, sondaı-aq áýe taksıi úshin eksperımenttik orta men alańdy belgileý máseleleri qarastyryldy.
Qalany tartymdy etip jasaý jáne kadrlyq áleýetti nyǵaıtý maqsatynda Alataý qalasy mamandary úshin ıpotekalyq kredıt berý lımıtin ulǵaıtý usynyldy.
Eske sala keteıik, 2024 jyldan bastap Almaty oblysynyń ákimdigi men «Otbasy bank» AQ birlesip 35 jasqa deıingi jastar úshin «Almaty Jastary» jeńildetilgen ıpotekalyq kredıt berý baǵdarlamasyn iske qosty. Bul baǵdarlamaǵa ótken jyly jergilikti bıýdjetten 500 mln teńge bólinip, taǵy 500 mln teńge bank tarapynan qarjylandyryldy. Bul 55 otbasynyń turǵyn úımen qamtamasyz etilýine múmkindik berdi. Qazirgi ýaqytta 44 úmitker óz páterleriniń kiltterin aldy.
Jobalaý keńsesiniń otyrysynyń qorytyndysy boıynsha Qanat Bozymbaev memlekettik organdarǵa atqarylatyn jumystyń kólemi týraly eskertip, mınıstrlikter men ákimdikterdiń laýazymdy tulǵalarynyń tapsyrmalardy ýaqytynda oryndamaýyna jeke jaýapkershilik júkteıtinin eske saldy.
Budan buryn búgin Jambyl oblysynda bıznes ókilderi men qoǵam qaıratkerleri QR Ulttyq ekonomıka vıtse-mınıstri Baýyrjan Qudaıbergenovpen kezdeskenin habarladyq.