Alataý qalasy bıýdjetinen basqa bıýdjetterge qarajat alýǵa jol berilmeıdi — zań jobasy
ASTANA. KAZINFORM — Alataý ózin-ózi qamtamasyz etkenge deıin qala bıýdjetinen basqa bıýdjetterge qarajat alýǵa jol berilmeıdi. Bul týraly Parlament palatalarynyń birlesken otyrysynda Premer-mınıstrdiń orynbasary Qanat Bozymbaev aıtty.
— Alatau City Authority respýblıkalyq bıýdjettik baǵdarlamalardyń derbes ákimshisi bolady. Onyń bıýdjeti respýblıkalyq bıýdjet quramynda bloktyq bıýdjetteý qaǵıdaty boıynsha qalyptasyp, negizinen ınfraqurylymdy damytýǵa jáne uzaq merzimdi jobalardy qoldaýǵa baǵyttalady, — dedi Qanat Bozymbaev.
Úkimet basshysy orynbasarynyń málimetinshe, jobalardy irikteý men qarjylandyrý tártibin Premer-mınıstr basqaratyn keńes bekitetin bolady.
— Al qalanyń jergilikti bıýdjeti áleýmettik jáne aǵymdaǵy mindetterdi qarjylandyrýǵa jumsalady. Alataý ózin-ózi qamtamasyz etkenge deıin qala bıýdjetinen basqa bıýdjetterge qarajat alýǵa jol berilmeıdi, — dedi ol.
Aıta keteıik, Parlament palatalarynyń birlesken otyrysynda depýtattar «Alataý qalasynyń arnaýly mártebesi týraly» Qazaqstan Respýblıkasy Konstıtýtsııalyq zańynyń jobasyn birinshi oqylymda qarap jatyr.
