Alataý qalasy aıryqsha mártebe alady — Qanat Bozymbaev
ASTANA. KAZINFORM — Alataý qalasyna aıryqsha mártebe beriledi. Bul týraly Astana halyqaralyq forýmynda Premer-mınıstrdiń orynbasary Qanat Bozymbaev aıtty.
Onyń aıtýynsha, ótken jyly Alataý qalasynyń bas jospary bekitilgen. Al búginde oǵan túzetýler engizý jalǵasyp jatyr.
— Óıtkeni, ómir bir orynda turmaıdy. Paıplaında 36 jańa ınvestıtsııalyq joba bar. Onyń 14-i belsendi iske asyrylyp jatyr, shamamen 2 mlrd dollar ınvestıtsııa jáne 20 myńnan astam jumys orny. Munan bólek, atalǵan kompanııalardy durys josparlanǵan aýmaqtarǵa ornalastyryp, olarǵa qajetti ýchaskelerdi bólip, maýsym aıynda bas jospardy túzetýdi aıaqtaımyz. Ol qosymsha bekitiledi, — dedi vıtse-premer.
Úkimet basshysy orynbasarynyń sózine qaraǵanda, jazda árbir aýdan men shaǵyn aýdan boıynsha tyńǵylyqty josparlaý jobasyn, birinshi kezekte salynatyn ǵımarattar men qurylystardyń jobalyq-smetalyq qujattamasyn ázirleý bastalady.
— Munan bólek, bul jaı ǵana arnaýly ekonomıkalyq aımaq emes. Biz Alataý qalasy aıryqsha mártebe alý tıis dep usynys jasap otyrmyz. Bizge sheteldik ınvestıtsııa tartý qajet. Bárimiz de bilemiz, ekinshi jyl qatarynan Qazaqstannan tikeleı shetel ınvestıtsııasy ketip jatyr. Sondyqtan Alataý qalasy jaǵdaıdy túbegeıli ózgertýge beretin ósim núkteleriniń biri, — dedi ol.
Onyń atap ótýinshe, osy maqsatta ákimdik pen Caspian Group kompanııasy Qytaıdyń Shenchjen syndy tabysty qalasynyń negizin qalaǵan CRDI konsaltıngtiń ınstıtýtymen kelisimge qol qoıǵan.
— Qazir olarmen qarqyndy jumys jalǵasyp jatyr. Kúzge qaraı aıryqsha mártebe tujyrymy daıyn bolady dep úmittenemiz. Ońtústik-Shyǵys Azııa ınvestorlary úshin jumys isteı alýymyz úshin eń jaqsy jaǵdaı jasaý mańyzdy. Ol jerde qala aýmaǵynda vızasyz rejım, sheteldik azamattardyń jyljymaıtyn múlik satyp alýyna múmkindik berý qarastyrylǵan. Qazir jumys istep jatyrmyz, — dedi Qanat Bozymbaev.
Buǵan deıin Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev Alataý qalasyn damytý qaı baǵytta júretinin aıtqan edi.
Esterińizge sala ketsek, elordada eki kúndik Astana halyqaralyq forýmy ótip jatyr. Forýmǵa 7 000-nan astam qatysýshy tirkelgen. Eýropa, Ortalyq Azııa, Taıaý Shyǵys pen Afrıka elinen BUU, AAU, HKU jáne DZMU sııaqty jetekshi halyqaralyq uıymdardyń atynan 160-tan astam spıker shaqyrylǵan.
Іs-sharany ashqan Qasym-Jomart Toqaev elimiz SryptoCity dep atalatyn jańa pılottyq jobany júzege asyrýdy josparlap otyrǵanyn, Qazaqstan BUU Qaýipsizdik Keńesiniń quramyn keńeıtýdi qoldaıtynyn aıtty.