Alataý qalasy aldaǵy 30 jylda qalaı ózgeredi
ASTANA. KAZINFORM — Alataý qalalyq keńesinde qalany damytý men basqarýdyń strategııalyq máseleleri qaraldy, dep habarlaıdy Úkimettiń baspasóz qyzmeti.
Qazaqstan Respýblıkasynyń Premer-mınıstri Oljas Bektenovtiń tóraǵalyǵymen ótken Alataý qalalyq keńesiniń otyrysynda qalanyń uzaqmerzimdi damýy, arnaıy quqyqtyq rejımniń normatıvtik bazasyn jáne qalalyq basqarý júıesin qalyptastyrý máseleleri qaraldy.
Prezıdenttiń «Jańa tarıhı kezeńdegi Qazaqstannyń ózekti mindetteri» atty Joldaýynda «qarqyndy damıtyn qala» atanyp otyrǵan Alataý ınvestıtsııalar men kásipkerlik úshin qolaıly ortaǵa aınalatyny atap ótilgen.
Kún tártibinde qaralǵan basty máselelerdiń biri — Alataýdy damytýdyń aldaǵy 30 jylǵa arnalǵan uzaqmerzimdi josparynyń jobasy. Jospar bolashaq tehnologııalarǵa beıimdele alatyn jáne ómir súrýge qolaıly jaǵdaılar men bıznesti júrgizý úshin boljamdy jaǵdaılardy qamtamasyz ete alatyn zamanaýı, ınvestıtsııalyq tartymdy jáne turaqty qalany qurýǵa negiz qalaıdy.
Qujat Arup kompanııasynyń halyqaralyq keńesshilerimen birlesip, aýmaqty keshendi túrde taldaý, ekonomıkalyq jáne demografııalyq áleýetti baǵalaý, qalanyń keńistikke ornalastyrý qurylymyn, kólik jáne ınjenerlik ınfraqurylymyn jobalaý negizinde daıyndalǵan.
— Jospar jobasyn ázirleýdegi negizgi mindet qalanyń birtutas ári teńdestirilgen modelin qurý boldy, onda ekonomıkalyq damý, kólikke qol jetimdilik jáne ınfraqurylym men qalalyq ortanyń sapasy tyǵyz baılanystyrylǵan. Basty nazar jospar boıynsha qabyldanǵan sheshimderge, aýmaqtyq jáne ekologııalyq shekteýlerdi esepke alýǵa, ınvestıtsııalyq jobalardy ıntegratsııalaýǵa, sondaı-aq ınfraqurylymdyq qajettilikterdi halyqtyń boljamdy ósýimen jáne jumyspen qamtýmen úılestirýge aýdaryldy, — delingen habarlamada.
Otyrys barysynda Alataý qalasynyń arnaıy rejıminiń quqyqtyq negizin qalyptastyrýǵa baǵyttalǵan eki Retteýshi erejeniń jobasy da qaraldy.
Birinshi qujat normatıvtik quqyqtyq aktilerge biryńǵaı talaptardy, olardy ázirleý, qabyldaý jáne qoldaný tártibin belgileıdi. Qujatta quqyqtyq saraptama júrgizý, jarııa talqylaý jáne aktilerdi qazaq, orys jáne aǵylshyn tilderinde jarııalaý kózdelgen.
Ekinshi joba arnaıy quqyqtyq rejım sheńberinde Alataý rezıdenti bolyp sanalatyn zańdy tulǵalardyń qyzmetin retteıdi. Ony qabyldaý quqyqtyq senimdilikti arttyrýǵa, retteýdiń ashyqtyǵyn qamtamasyz etýge jáne kásipkerlikti damytý men ınvestıtsııalar tartý úshin qolaıly jaǵdaılar jasaýǵa arnalǵan.
Otyrystyń taǵy bir máselesi — Alataýdyń normatıvtik júıesin ázirleýge qatysatyn qala ákimshiliginiń alqaly basqarý organy Retteýshi komıssııany jasaqtaý. Keńestiń qaraýyna quqyq, ınvestıtsııalar, qarjylyq retteý, tsıfrlyq aktıvter jáne qala qurylysy salasynda halyqaralyq tájirıbesi bar komıssııanyń táýelsiz músheleriniń kandıdatýralary usynyldy. Halyqaralyq sarapshylardyń qatysýy qalanyń arnaıy quqyqtyq rejıminiń erekshelikterin eskere otyryp, retteýdiń ozyq tájirıbelerin qoldanýdy qamtamasyz etýge arnalǵan.
Sondaı-aq Alataý ákimshiliginiń mamandandyrylǵan organdary qyzmetiniń uıymdastyrýshylyq máseleleri talqylandy. Olardyń qyzmeti jer resýrstaryn basqarýdy, qala qurylysyn josparlaýdy, qurylys jobalaryn súıemeldeýdi, tsıfrlyq aktıvterdi damytýdy jáne «bir tereze» qaǵıdaty boıynsha halyqqa ári bızneske qyzmetter kórsetýdi qamtıtyn bolady.
Keńeste qaralǵan máseleler Alataýdy damytýdyń ınstıtýtsıonaldyq jáne normatıvtik negizin dáıekti qalyptastyrýǵa, boljanatyn iskerlik ortany qurýǵa, qalalyq basqarýdyń tıimdiligin arttyrýǵa jáne uzaqmerzimdi ınvestıtsııalyq jobalardy júzege asyrýǵa baǵyttalǵan.
Otyrys qorytyndysy boıynsha Premer-mınıstr Oljas Bektenov jaýapty memlekettik organdarǵa belgilengen merzimderdiń saqtalýyn qamtamasyz etýdi, normatıvtik quqyqtyq bazany qalyptastyrýdy jedeldetýdi jáne Alataý qalasyn damytýdyń strategııalyq mindetterin dáıekti júzege asyrý úshin qajetti sharalardy qabyldaýdy tapsyrdy.
Buǵan deıin Úkimet «Alataý qalasynyń arnaýly quqyqtyq rejımi týraly» Konstıtýtsııalyq zańǵa qajetti ózgerister daıyndaıtynyn jazdyq.
