Alataý qalasy ákiminiń basty qyzmeti ne bolmaq
ASTANA. KAZINFORM — Alataý qalasy ákimin Premer-mınıstr basqaratyn keńes taǵaıyndaıtyn bolady. Bul týraly Premer-mınıstrdiń orynbasary Qanat Bozymbaev aıtty.
— Ózderińiz bilesizder, Alataý qalasy Almaty oblysynyń túrli aýyl aýdanynyń bólikterinen quraǵan. Ázirshe, qalany damytýǵa baıypty qandaı da bir qadam jasala qoıǵan joq. Sondyqtan endi ǵana alǵashqy baıypty qadamdar jasaý kerek jáne zań soǵan arnalǵan.
Alataý qalasynda naqty bólinis bolady. Ákim men máslıhat áleýmettik sala, ınfraqurylym, kommýnaldyq sharýashylyǵy syndy aǵymdaǵy máselelermen aınalysady.
Onyń ózi bıýdjeti bolady. Alatau City Authority-diń memlekettik qory jasaqtalady. Ol memlekettik organ sııaqty. Onyń óz damý bıýdjeti bolady. Ol damýmen aınalysady, ıaǵnı atalǵan qalany damytý strategııasyn jasaıdy. Olar Alataý qalasy úshin zań sııaqty bolatyn barlyq aktilerdi daıyndap, ony Alataý qalasyn damytý jónindegi keńes qabyldaıdy. Keńesti Premer-mınıstr basqaryp, quramyn Prezıdent bekitedi. Keminde úshte biri táýelsiz dırektorlar bolady, — dedi vıtse-premer Parlamenttiń birlesken otyrysynan keıin.
Onyń naqtylaýynsha, Alatau City Authority qalany damytý, ınvestıtsııa tarty, úlken ınfraqurylymdardy iske asyrýmen aınalysady. Ákimdik pen qordyń bıýdjeti ártúrli bolǵanymen bir-birin tolyqtyryp otyrady.
— Qala ákimin keńes taǵaıyndaıdy. Qazir ákimdi Almaty oblysynyń ákimi taǵaıyndaıtynyn bilesizder. Biraq, Prezıdent tapsyrmasyna sáıkes, bul qala ortalyqtandyrylǵan baǵynysqa ótedi, ıaǵnı keńes tarapynan taǵaıyndalady. Ákimniń negizgi qyzmeti sıtı-menedjerlik, ıaǵnı, naǵyz atqarýshy bılik bolady. Oǵan eshteńeni oılap tabýdyń qajeti joq. Josparlardy elimizdiń jáne sheteldik eń úzdik aqyl-oı ıeleri ázirleıdi, — dedi Qanat Bozymbaev.
Aıta keteıik, Parlament búgin Alataý qalasynyń arnaýly mártebesi týraly qujatty birinshi oqylymda maquldady.
