Alataý qalalyq emhanasy endi kent turǵyndaryna ǵana emes, oblys turǵyndaryna da qyzmet kórsetetin bolady - Ahmetjan Esimov
ALMATY. 22 maýsym. QazAqparat - Alataý kentinde jańadan salynǵan emhana ǵımaraty eń ozyq qural- jabdyqtarmen qamtamasyz etilgen.
Bul týraly Almaty qalasynyń ákimi Ahmetjan Esimov búgin Medeý aýdanyndaǵy densaýlyq saqtaý mekemesiniń jumysymen tanysý kezinde aıtty.
«Alataý kenti turǵyndaryna sapaly qyzmet kórsetý úshin arnaıy osy emhana salyndy. Barshańyzǵa málim munda buǵan deıin Elbasy tapsyrmasy boıynsha Alataý ınnovatsııalyq tehnologııalar parki quryldy. Qazir onda 100-den astam kompanııa ornalasqan. Bul keleshegi zor úlken eldi-meken. Turǵyndarynyń sany qazir 6 myńnan 10 myńǵa deıin jetip otyr», - deıdi A.Esimov. Shahar basshysynyń aıtýynsha, Alataýdyń ınfraqurylymyn damytyp, qalalyq úlgidegi kentke aınaldyrý jumystary júrgizilýde. Onda áleýmettik nysandar salynyp, joldar jóndelýde.
Aǵymdaǵy jyly «Alataý» ınnovatsııalyq tehnologııalar parki erkin ekonomıkalyq aımaǵy aýmaǵynda ekinshi kezeńin ıgerý jumystary bastalmaq. Damý josparyna sáıkes onda keminde 250 ınnovatsııalyq kompanııa jumys jasap, 12 500 jumys orny qurylady. Parktiń bilim berý mekemelerinde 6 900-ge jýyq oqýshy oqyp, kent turǵyndary 5 ese óspek.
