Alatau City jobasyna $1,3 mlrd ınvestıtsııa tartý kózdelgen

Investıtsııalyq dóńgelek ústelge JPMorgan Chase, AstraZeneca, BP jáne Brookfield Asset Management kompanııalaryn qosa alǵanda, 70-ten astam kompanııa, ınvestıtsııalyq qor, bank jáne saraptamalyq uıymdardyń ókilderi qatysty. Qatysýshylarǵa Alatau City-di damytý tujyrymdamasy, qalanyń ınvestıtsııalyq múmkindikteri, perspektıvaly ınfraqurylymdyq jobalar jáne olardy júzege asyrýǵa sheteldik kapıtaldy tartý tetikteri tanystyryldy.

— Roýd-shoýdy álemdegi jetekshi qarjy jáne quqyq ortalyqtarynyń biri — Londonda bastaýymyz kezdeısoq emes. Ulybrıtanııa — bizdiń strategııalyq seriktesimiz. Alatau City — Prezıdent Qasym-Jomart Toqaevtyń bastamasymen júzege asyrylyp jatqan ulttyq joba. Biz Eýropa men Azııa arasyndaǵy ekonomıkalyq ózara is-qımyldyń mańyzdy býynyna aınalýǵa tıis bıznes, qarjy, tehnologııa jáne logıstıka salalarynyń jańa ortalyǵyn quryp jatyrmyz, — dedi Qanat Bozymbaev.

Dóńgelek ústel aıasynda «Alatau City Authority» arnaıy basqarý uıymynyń bas atqarýshy dırektory Álisher Ábdiqadyrov qalany damytýdyń negizgi baǵyttaryn, onyń ishinde zamanaýı ınjenerlik jáne kólik ınfraqurylymyn, ónerkásiptik, iskerlik jáne logıstıkalyq aımaqtardy qurý josparlaryn tanystyrdy. Arup halyqaralyq ınjenerlik-konsaltıngtik kompanııasy qatysýshylardy keńistikti josparlaý jáne qalalyq ınfraqurylymdy damytý tásilderimen tanystyrdy. Al «Báıterek» holdıngi ınvestıtsııalyq jobalardy qarjylandyrý quraldaryn usyndy.

Alatau City-diń basty artyqshylyqtarynyń biri — 2026 jylǵy 8 mamyrdaǵy Konstıtýtsııalyq zańda kózdelgen arnaýly quqyqtyq rejım. Ol Anglııa men Ýels quqyǵynyń qaǵıdattaryn qoldaný múmkindigin, ınvestıtsııalardy qorǵaýdyń zamanaýı tetikterin jáne boljamdy iskerlik orta qalyptastyrýdy kózdeıdi.

Norton Rose Fulbright, Reed Smith jáne Boies Schiller Flexner halyqaralyq zańgerlik kompanııalarynyń qatysýymen ótken saraptamalyq sessııada ınvestıtsııa tartýdyń quqyqtyq tetikteri, memlekettik-jekeshelik áriptestik, halyqaralyq tórelik, tsıfrlyq aktıvterdi retteý jáne kommertsııalyq daýlardy sheshý máseleleri talqylandy. Sondaı-aq aǵylshyn quqyǵynyń qaǵıdattaryn qoldanýǵa negizdelgen Alatau City-diń mamandandyrylǵan ınvestıtsııalyq sotyn qurý perspektıvalary qarastyryldy.

Іskerlik baǵdarlama aıasynda London qor bırjasynyń, Brookfield Asset Management, Société Générale, J.P. Morgan jáne Eýropalyq qaıta qurý jáne damý bankiniń basshylyǵymen kelissózder júrgizildi. Taraptar ınstıtýtsıonaldyq kapıtal tartý, jobalyq qarjylandyrý quraldaryn paıdalaný jáne halyqaralyq qarjy uıymdaryn qalanyń energetıkalyq, kólik jáne ınjenerlik ınfraqurylymyn damytýǵa qatystyrý múmkindikterin qarastyrdy.

— Іs-shara qorytyndysy boıynsha halyqaralyq seriktestermen jalpy ınvestıtsııalyq áleýeti $1,3 mlrd bolatyn 9 kelisimge qol qoıyldy. Kelisimder ınfraqurylymdyq jáne ınvestıtsııalyq jobalardy qarjylandyrý, bilim berý jáne densaýlyq saqtaý ınfraqurylymyn damytý, sondaı-aq halyqaralyq yntymaqtastyqty keńeıtý baǵyttaryn qamtıdy, — delingen Úkimet habarlamasynda.

Atap aıtqanda, University of Exeter, Brighton College jáne Repton Group qatysýymen bilim berý uıymdaryn ashý jobalaryn pysyqtaý kózdelgen. AstraZeneca jáne Crescent Meditours kompanııalarymen yntymaqtastyq medıtsınalyq ınfraqurylymdy damytý, ınvestıtsııa tartý jáne ǵylymı tájirıbe almasý máselelerin qamtıdy.

— Qazirgi ýaqytta Alatau City-diń ınvestıtsııalyq portfelinde jalpy quny shamamen $6,9 mlrd bolatyn 67 joba bar. Olardy júzege asyrý nátıjesinde 55 myńǵa jýyq jumys ornyn ashý kózdelgen. Sonymen qatar qalada energııamen, sýmen jáne gazben jabdyqtaý, káriz jelileri men avtomobıl joldaryn damytýǵa baǵyttalǵan 28 ınfraqurylymdyq joba boıynsha jumys istelip jatyr. Bul maqsatqa 35,3 mlrd teńge bólingen, — delingen habarlamada.

Investıtsııalyq roýd-shoý aıasynda Ulybrıtanııanyń memlekettik organdary, qarjy ınstıtýttary jáne strategııalyq seriktester ókilderimen kelissózder jalǵasady. Eýropalyq roýd-shoýdyń kelesi kezeńi Germanııada ótedi.

Aıta ketelik Alatau City-degi ındýstrııalyq aımaqtar biryńǵaı ekonomıkalyq júıege biriktiriledi.