Alatau City tsıfrlyq egizin jasaýǵa ońtústikkoreıalyq kompanııalar kómektesedi
QONAEV. KAZINFORM – Alataý qalasynyń tsıfrlyq egizi jasalady. Bul týraly «Alatau City Authority» arnaýly basqarý uıymy habarlady.
Resmı málimetke sáıkes, Alatau City Authority uıymy men ońtústikkoreıalyq kompanııalar - AST Holdings Co., Ltd. jáne ILJOO GnS Co., Ltd. Smart City tsıfrlyq tehnologııalar salasyndaǵy yntymaqtastyq týraly úshjaqty memorandýmǵa qol qoıdy. Qujat Alataý qalasynyń tsıfrlyq egizin (Digital Twin) jáne zattar ınterneti (IoT) tehnologııalaryn qoldaný boıynsha birlesken pılottyq jobany iske qosýdy kózdeıdi.
Qol qoıý rásimi Pýsanda Global Smart City Expo halyqaralyq kórmesi aıasynda ótti. Kelesi praktıkalyq kezeń – Alatau City-diń tsıfrlyq egizi jónindegi pılottyq jobany pysyqtaý.
- Memorandým aıasynda taraptar birden qymbatqa túsetin tolyqqandy jobaǵa kóshpeı, tehnologııalardy praktıkalyq synaqtan ótkizedi. Pılottyq joba qalalyq derekterdi jınaý men sınhrondaýdy, ınjenerlik júıelerdiń monıtorıngin tekserýge múmkindik beredi. Bolashaqta tsıfrlyq model qala qurylysynda, kólik logıstıkasynda, kommýnaldyq jeliler monıtorınginde jáne ekologııalyq qaýipsizdik salasynda basqarýshylyq sheshimder qabyldaýdyń qoldanbaly quralyna aınalady, - dep habarlady uıym baspasóz qyzmeti.
Alatau City Authority bas atqarýshy dırektory Álisher Ábdiqadyrovtyń aıtýynsha, Alataýdyń tsıfrlyq egizin jasaý úshin qala salynyp bitkenin kútý qajet emes. Qazirden bastap aqyldy qalanyń qajetti IT-arhıtektýrasynyń irgetastan qalyptastyrý kerek.
- Biz tsıfrlyq egizdi jaı prezentatsııalyq 3D-model emes, naqty derekter negizinde qalanyń damýyn basqarýǵa arnalǵan jumys isteıtin analıtıkalyq júıe retinde qarastyramyz, – dedi ol.
Eske salaıyq, bul elimizde ázirlengeli jatqan alǵashqy qalanyń tsıfrlyq egizi emes. 2022 jyldan beri Almatyda megapolıstiń tsıfrlyq egizi qurylatyny týraly aıtylyp keledi.
Almatynyń tsıfrlyq egizi negizgi 3 deńgeıdi qamtýy tıis. Birinshi deńgeı qalanyń ınjenerlik ınfraqurylymyn kórsetedi. Ekinshi deńgeıde qala qurylysyn modeldeý jáne ońtaılandyrý, sondaı-aq kólik qozǵalysyn baqylaý jumysy júrgiziledi. Úshinshi tabıǵı-klımattyq deńgeı bolady. Onda aýa sapasy sekildi qalanyń damýyna áser etetin barlyq tabıǵı qubylystar qamtylady.
Byltyr Tsıfrlandyrý basqarmasy bul jobany qarjylandyrýǵa Qytaıdyń halyqaralyq damý jónindegi yntymaqtastyq agenttiginiń (China International Development Cooperation Agency) grant qarajatyn tartý josparlanǵanyn málimdedi.
Al 2026 jyldyń basynda vedomstvo ókilderi megapolıstiń tsıfrlyq egizin jasaý naqty qashan bastalatynyn aıtty.
