Alatau City tolyqtaı jeke ınvestıtsııalar esebinen salynady

ASTANA. KAZINFORM — Alatau City sheteldik ınvestorlardy tartýdyń jańa múmkindigi. Búginde jobaǵa qyzyǵýshylyq tanytyp otyrǵan iri ınvestorlar kóp.

Bul týraly QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory «Prezıdent Joldaýy: Qazaqstan damýynyń aldaǵy baǵyttary» taqyrybynda ótken otyrysta aıtty.

— Sheteldik ınvestıtsııalar kóleminiń azaıýy — jahandyq sıpattaǵy úrdis. Ol tek bizdiń óńirde emes barlyq aımaqta baıqalyp otyr. Bul jaǵdaıda Qazaqstan kútýshi pozıtsııasynda bola almaıdy. Elimiz iri ınvestorlardy belsendi túrde tartý úshin ózindik, erekshe usynysqa ıe bolýy kerek. Osyndaı usynystardyń biri retinde memleket Alatau City jobasyn usyndy. Bul jobaǵa qazirdiń ózinde úlken qyzyǵýshylyq bar. Bul dástúrli ınvestıtsııa tartý modelinen erekshelenedi. Buryn biz kóbinese kim kelip, ne usynady dep kútip otyratynbyz. Al qazir «Mine, erekshe orta, daıyn ınfraqurylym, ınvestıtsııaǵa laıyqty joba bar» dep ózimiz usynyp otyrmyz. Bul qala óziniń ınstıtýtsıonaldy ortasyn, artyqshylyqtaryn, tipti, jeke ıýrısdıktsııasyn qalyptastyrady, — deıdi Jandos Shaımardanov.

Instıtýt dırektory Alatau City jeke ınvestorlar esebinen salynatyn elimizdegi tuńǵysh qala bolatynyn jetkizdi.

— Táýelsizdik alǵannan keıin Astana men Túrkistan bıýdjettik ınvestıtsııalar arqyly damydy. Al Alatau City tolyǵymen jeke ınvestıtsııalar esebinen boı kóteretin qala bolady. Bul — qarjymyz shekteýli bolyp turǵan kezde, ınvestıtsııa tartýǵa kómektesetin óte mańyzdy múmkindik, — dedi ol.

Aıta keteıik, Memleket basshysy Joldaýynda Alatau City aımaqtaǵy tolyq tsıfrlanǵan alǵashqy qalaǵa aınalýǵa tıis ekenin aıtqan edi.