Alatau city: Qandaı jaǵdaıda sheteldik ınvestordan jer qaıtaryp alynady

ASTANA. KAZINFORM — Májilis depýtaty Serik Erýbaev Premer-mınıstrdiń orynbasary Qanat Bozymbaevtan Alataý qalasynyń aýmaǵyndaǵy arnaıy quqyqtyq rejım aıasynda sheteldik ınvestorlardyń jer ýchaskelerin paıdalanýy qalaı retteletinin surady. 

— Zań jobasynda Alataý qalasy aýmaǵynda múliktik jáne jer qatynastaryn retteýdiń arnaıy quqyqtyq rejımin belgileý kózdelgen. Joba Alataý qalasyn damytýǵa jáne ınvestorlar tartýǵa baǵyttalǵanyn eskersek, arnaıy quqyqtyq rejım sheńberinde, onyń ishinde jer resýrstaryn paıdalaný bóliginde sheteldik ınvestorlarmen azamattyǵy joq adamdardyń qatysýyn naqtylap túsindirip berseńiz, — dedi depýtat.

Óz jaýabynda Qanat Bozymbaev jer taqyryby — el azamattary úshin óte mańyzdy suraq ekenin atap ótti.

— Alataý qalasynyń barlyq ınvestoryna, onyń ishinde sheteldik ınvestorlarǵa jer ýchaskeleri tek naqty ınvestıtsııalyq jobalardy iske asyrýǵa jáne bıznes-lıtsenzııa úshin jalǵa nemese basqasha túrde beriledi, — dedi Qanat Bozymbaev.

Onyń aıtýynsha, jer telimin berýdiń óz mindettemeleri jáne belgilengen ýaqyty bolady. Eger eki jyl ishinde jer ústinde zaýyt, fabrıka, ýnıversıtet nemese qonaqúı salynbasa, onda aıyppul salynady.

— Taǵy bir eki jyldan keıin de ári qaraı damý bolmasa, onda jer keri qaıtarylady. Sondyqtan bul másele tek qana ınvestıtsııalyq jobalarǵa beriletin bolady. Al Qazaqstan azamattaryna jer berý máselesi eldegi zań boıynsha retteledi, — dep túsindirdi Premer-mınıstr orynbasary.

Aıta keteıik, elordada Parlament palatalarynyń birlesken otyrysy bastaldy. Jıynda Májilis pen Senat depýtattary «Alataý qalasynyń arnaýly mártebesi týraly» Qazaqstan Respýblıkasy Konstıtýtsııalyq zańynyń jobasyn birinshi oqylymda qarap jatyr.

Alataý qalasyndaǵy negizgi strategııalyq sheshimderdi Premer‑mınıstr basqaratyn Keńes aıqyndaıdy. Investorlardyń quqyqtary halyqaralyq deńgeıde qorǵalady. Al salyq jeńildikteri tek basym salalardaǵy jańa ınvestıtsııalyq jobalarǵa beriledi.