Alatau City ınvestorlary 25 jylǵa salyqtan bosatylady
ASTANA. KAZINFORM – Alataý aqyldy qalasyna qarjy quıǵan ınvestorlarǵa 25 jyl boıy qoldaý kórsetiledi. Ásirese salyq jaǵynan birqatar jeńildik jasalady. Batys Eýropa – Batys Qytaı avtomagıstraliniń boıynda ornalasqan zamanaýı shahar iskerlik pen qarjylyq, bilim men medıtsına, ǵylym, ónerkásip, demalys pen týrızm ortalyǵyna aınalmaq. Jańa qalanyń ereksheligi týraly Alatau City Development Group kompanııasynyń ókili Mıras Quttybaı «Jibek joly» telearnasyndaǵy «Búgin LIVE» baǵdarlamasynda aıtty.
«Alatau City» jobasyna 2024 jyldyń 9 qańtarynda Prezıdent Jarlyǵymen qala mártebesi berildi. Munda qazir 60 myńǵa jýyq halyq turady. Jospar boıynsha Alataý 2 mıllıon adamǵa arnap salynady jáne 1 mıllıon adamǵa jumys orny ashylady.
Memleket basshysy bıylǵy Joldaýynda Alatau qalasynyń aımaqtaǵy tolyq tsıfrlanǵan alǵashqy qala atanýy keregin ári tolyǵymen jeke ınvestorlar esebinen salynýy qajettigin aıtqan edi.
– Tutas qala aýmaǵy arnaıy ekonomıkalyq aımaq bolyp sanalady. Sondyqtan qalaǵa kelgen sheteldik ınvestorlarǵa tolyǵymen memlekettik qoldaý jasalady. Olar barlyq salyqtan bosatylady, kedendik salyqtan bosatylady. Infraqurylymdar jáne mektep, balabaqsha sekildi áleýmettik nysandar memleket esebinen salynady. Bul ınvestorlarǵa jasalǵan úlken kómek. Biz sheteldik jáne qazaqstandyq ınvestorlardy bólip-jarmaımyz, barlyǵyna birdeı jaǵdaı jasalady, – dedi M.Quttybaı.
Onyń aıtýynsha, arnaıy ekonomıkalyq aımaq rejımi 25 jylǵa, ıaǵnı 2048 jylǵa deıin jumys isteıdi. Smart sheshimderden bólek, resýrstardy únemdeý, qaıta óńdeý sekildi ekologııalyq baǵytqa da basa kóńil bólinedi.
Alataý Qonaev pen Almaty qalasynyń dál ortasynda ornalasqan. Aýa raıy da qolaıly jáne qurylys jumystaryn qysy-jazy júrgizýge bolady. Jańa qala Almatyǵa artylǵan júktemeni jeńildetip, shetelge aǵylǵan bilimdi jastardy tartýǵa da yqpal etpek.
Jaqynda Sıngapýr jáne Seýl qalalarynda ınvestorlar úshin Alataý qalasynyń sheteldik tanystyrylymy ótedi. Ázirge Qytaı, Sıngapýr, AQSh, Taıaý Shyǵys memleketteri ınvestıtsııa salýǵa qyzyǵýshylyq tanytyp otyr.
Aıta keteıik, endi memleketten kómek alǵan bankter jańa ınvestorǵa satylyp otyrady.