Alatau City: ınvestıtsııalyq áleýeti 2 mlrd dollardan asty
ASTANA. KAZINFORM — Qazaqstan Respýblıkasy Premer-mınıstriniń orynbasary Qanat Bozymbaev bastaǵan qazaqstandyq delegatsııa Alatau City jobasynyń Eýropadaǵy ınvestıtsııalyq roýd-shoýyn aıaqtady. Bul týraly Aqordanyń baspasóz qyzmeti habarlady.
Іskerlik baǵdarlama London, Berlın jáne Maındaǵy Frankfýrt qalalaryn qamtydy.
Roýd-shoýdyń qorytyndy kezeńi Maındaǵy Frankfýrtta ótti. Onda qazaqstandyq delegatsııa Alatau City-diń ınvestıtsııalyq múmkindikterin tanystyryp, qalanyń ınfraqurylym, ónerkásip jáne tehnologııalyq jobalaryn júzege asyrýǵa nemis bıznesin tartý máselelerin talqylady. Bankter, ınvestıtsııalyq uıymdar men halyqaralyq kompanııalardyń ókilderi qatysqan Alatau City Investment Round Table dóńgelek ústelinde ınfraqurylymdyq jobalardy qarjylandyrý, uzaqmerzimdi kapıtal tartý jáne Germanııanyń qarjy quraldaryn paıdalaný máseleleri qaraldy.
Qanat Bozymbaev Alatau City-di damytýdyń strategııalyq basymdyqtary men Qazaqstan jáne Germanııa arasyndaǵy ınvestıtsııalyq yntymaqtastyqty keńeıtý múmkindikterin tanystyrdy. Alatau City Authority bas atqarýshy dırektory Álisher Ábdiqadyrov qatysýshylarǵa qalanyń damý tujyrymdamasy, negizgi baǵyttary jáne halyqaralyq ınvestorlar úshin jasalǵan jaǵdaılar týraly baıandady. Frankfýrttaǵy kelissózder nátıjesinde Alatau City jobalaryna banktik qarjylandyrý tartý jóninde kelisimder jasaldy. Tıisti qujattarǵa Alatau City Authority, Alatau City Bank jáne Germanııanyń AKA Bank pen KfW qarjy ınstıtýttary (Germanııanyń memlekettik damý banki) qol qoıdy. Yntymaqtastyq ınvestıtsııalyq jobalardy qarjylandyrýdy jáne nemis jabdyqtaryn satyp alýdy kózdeıdi.
WILO, Zrinski Solutions, Myron AG, Nikolaus & Co. jáne Schneider Group kompanııalarymen ónerkásip jáne tehnologııalyq yntymaqtastyq máseleleri talqylandy. Atap aıtqanda, ınjenerlik jáne servıstik ınfraqurylymdy damytý, medıtsınalyq buıymdar óndirisin uıymdastyrý, aktıvterdi tokenızatsııalaý tetikterin engizý jáne ınvestıtsııalyq konsaltıngti damytý múmkindikteri qarastyryldy. Berlın men Frankfýrtta ótken is-sharalardy qamtyǵan roýd-shoýdyń Germanııadaǵy kezeńinde ınvestıtsııalyq áleýeti $715 mln bolatyn 18 kelisimge qol qoıyldy.
Jalpy Alatau City-diń Eýropadaǵy ınvestıtsııalyq roýd-shoýy qorytyndysynda jıyntyq ınvestıtsııalyq áleýeti $2 mlrd-tan asatyn 27 kommertsııalyq qujatqa qol qoıyldy. Yntymaqtastyq qarjy sektoryn, ınjenerlik ınfraqurylymdy, bilim berý, mashına jasaý, densaýlyq saqtaý, týrızm jáne tsıfrlyq ekonomıka salalaryn qamtıdy.
Aıta ketelik Alatau City jobasyna $1,3 mlrd ınvestıtsııa tartý kózdelgen.
