Alatau City ınfraqurylymdy damytý úshin germanııalyq tehnologııalardy tartady
ASTANA. KAZINFORM – Qazaqstan Respýblıkasy Prezıdenti Qasym-Jomart Toqaevtyń Germanııa Federatıvtik Respýblıkasyna resmı sapary aıasynda Alatau City Authority Alatau City-de ınvestıtsııalyq jáne ınfraqurylymdyq jobalardy iske asyrý boıynsha kompanııalarmen birqatar kelissózder júrgizdi. Іskerlik baǵdarlamanyń qorytyndysy boıynsha yntymaqtastyq týraly alty memorandýmǵa qol qoıyldy.
28-29 qyrkúıekte Alatau City Authority ókilderi Myron AG (Santa Capital), Rhenus, D.A.R. Metall AG, Wilo jáne Siemens Healthineers kompanııalarymen bes ekijaqty kezdesý ótkizdi. Kelissózder logıstıka, qaldyqtardy qaıta óńdeý, ınjenerlik jáne medıtsınalyq ınfraqurylym, óndiristi oqshaýlaý jáne tsıfrlyq qarjy salalaryndaǵy jobalardy qamtydy.
Myron AG (Santa Capital) kompanııasymen naqty aktıvterdi tokenızatsııalaý boıynsha pılottyq jobalar jáne Alatau City-de jobalardy iske asyrý úshin transshekaralyq qarjylandyrýdy tartý múmkindikteri talqylandy.
Rhenus-pen kelissózder barysynda Baıserke stantsııasyndaǵy kompanııanyń qoldanystaǵy termınalymen ıntegratsııalana otyryp, A klasyndaǵy qoıma obektilerin jáne taratý ortalyǵyn qurý perspektıvalary qarastyryldy. Sondaı-aq, termınalǵa júkterdi jetkizý úshin ushqyshsyz tehnologııalardy qoldaný múmkindigi talqylandy.
D.A.R. Metall AG kompanııasymen Alatau City kásiporyndarynyń qaıtalama shıkizatty odan ári paıdalaný múmkindigimen turmystyq jáne ónerkásiptik qaldyqtardy qaıta óńdeý keshenin qurý perspektıvalary pysyqtaldy. Kompanııa sonymen qatar qurylys salasy úshin kompozıttik materıaldar óndirisin damytýǵa qyzyǵýshylyq bildirdi.
Wilo kompanııasymen kezdesýde Alatau City-de sorǵy jabdyqtarynyń servıstik jáne ınjenerlik ortalyǵyn qurý talqylandy. Joba jabdyqqa tehnıkalyq qyzmet kórsetýdi jáne mamandar daıarlaýdy, óndiristi oqshaýlaýdy odan ári keńeıtý múmkindigin kózdeıdi.
Siemens Healthineers kompanııasymen Alatau City-de kompanııanyń keńsesi men servıstik ortalyǵyn ashýdy, sondaı-aq qalanyń medıtsınalyq klasterin damytýǵa qatysýdy qosa alǵanda, densaýlyq saqtaý salasyndaǵy strategııalyq yntymaqtastyqtyń yqtımal baǵyttary qaraldy.
«Germanııalyq kompanııalarmen kelissózderdiń qorytyndysy boıynsha biz qalanyń logıstıkalyq, ınjenerlik, óndiristik jáne áleýmettik ınfraqurylymyn qurýǵa naqty qyzyǵýshylyq baryn kórip otyrmyz. Qol jetkizilgen ýaǵdalastyqtar jobalardy odan ári egjeı-tegjeıli pysyqtaýǵa, olardy iske asyrý tetikterin aıqyndaýǵa jáne Alatau City-di damytýǵa germanııalyq tehnologııalar men quzyretterdi tartýǵa negiz jasaıdy», – dep atap ótti «Alatau City Authority» arnaýly basqarý uıymynyń bas atqarýshy dırektory Álisher Ábdiqadyrov.
Qazaqstan-Germanııa bıznes-forýmy aıasynda Alatau City Authority germanııalyq kompanııalarmen yntymaqtastyq týraly alty memorandýmǵa qol qoıdy. Ýaǵdalastyqtar Wilo servıstik ortalyǵyn qurý, Rhenus-pen birlesip logıstıkalyq ınfraqurylymdy damytý, D.A.R. Metall AG-men turmystyq jáne ónerkásiptik qaldyqtardy qaıta óńdeý, SBP-Management-pen densaýlyq saqtaý salasynda mamandar daıarlaý, Schlaich Bergermann Partner (SBP)-men kún energetıkasy, qurylys jáne jobalaý sheshimderin saraptama júrgizý salasyndaǵy yntymaqtastyq, sondaı-aq KazPetFood pen Wagner Feedmill & Silo Plants arasyndaǵy úı janýarlaryna arnalǵan jem shyǵaratyn zaýytqa jabdyq jetkizý jónindegi ózara is-qımyldy kózdeıdi.
Іskerlik baǵdarlama barysynda Rhenus, Wilo jáne D.A.R. Metall AG ókilderi tıisti jobalardy Alatau City-de iske asyrýǵa múddeliligin rastady.
Qol jetkizilgen ýaǵdalastyqtar germanııalyq tehnologııalardy, quzyretter men ınvestıtsııalardy tartýǵa, Alatau City-diń zamanaýı ınjenerlik, logıstıkalyq, ekologııalyq jáne áleýmettik ınfraqurylymyn damytýǵa baǵyttalǵan. Kelesi kezeń – jobalardyń parametrleri men olardy iske asyrý tetikterin egjeı-tegjeıli pysyqtaý bolady.
Aıta keteıik, Alataý qalasyn damytýǵa jasandy ıntellekt qoldanylmaq.
