Alatau City-diń ınfraqurylymyna brıtandyq kapıtaldy tartý qaraldy
ASTANA. KAZINFORM — Alatau City-diń energetıkalyq, kólik jáne kommýnaldyq jobalaryn eksporttyq kredıtterdi, banktik kepildikterdi jáne brıtandyq eksportty memlekettik qoldaýdyń ózge de quraldaryn paıdalaný arqyly qarjylandyrý múmkindikteri qarastyryldy.
Premer-mınıstrdiń orynbasary Qanat Bozymbaev bastaǵan qazaqstandyq delegatsııa Ulybrıtanııa Úkimetiniń, UK Export Finance (UKEF) eksporttyq-kredıttik agenttiginiń, halyqaralyq bankterdiń jáne bilim berý uıymdarynyń ókilderimen kelissózder júrgizdi. Negizgi taqyryptar – Alatau City ınfraqurylymyn qarjylandyrý, brıtandyq tehnologııalardy tartý, sondaı-aq bilim berý men jasandy ıntellekt salasyndaǵy yntymaqtastyqty damytý.
UK Export Finance (UKEF) basshylyǵymen ótken dóńgelek ústelde Alatau City-diń energetıkalyq, kólik jáne kommýnaldyq jobalaryn eksporttyq kredıtterdi, banktik kepildikterdi jáne brıtandyq eksportty memlekettik qoldaýdyń ózge de quraldaryn paıdalaný arqyly qarjylandyrý múmkindikteri qarastyryldy.
Qazaqstan tarapy brıtandyq ınjenerlik kompanııalardy, jabdyq óndirýshilerdi jáne qarjy ınstıtýttaryn tartý arqyly júzege asyrylýy múmkin energetıkalyq obektilerdi, sýmen jabdyqtaý jáne sý burý júıelerin, kólik ınfraqurylymyn salý salasyndaǵy basym jobalardyń tizbesin qalyptastyrýdy usyndy.
Ulybrıtanııa Syrtqy ister mınıstriniń parlamenttik orynbasary lord Stıýart Výdpen kezdesýde eki el arasyndaǵy strategııalyq áriptestikti odan ári damytý máseleleri talqylandy. Taraptar brıtandyq bıznestiń ınfraqurylymdyq jáne tehnologııalyq jobalarǵa qatysýyn, sondaı-aq energetıka, ónerkásip jáne tsıfrlyq ekonomıka salalaryndaǵy yntymaqtastyq perspektıvalaryn qarastyrdy.
Kapıtal tartýdyń praktıkalyq tetikteri Standard Chartered-dyń memlekettik sektormen jumys isteý baǵyty jónindegi jahandyq jetekshisi Charlz Korbettpen kelissózderdiń taqyrybyna aınaldy. Sındıkattyq kredıtteý, halyqaralyq damý ınstıtýttarymen birlesip qarjylandyrý jáne eksporttyq-kredıttik agenttikterdiń kepildikterin paıdalaný múmkindikteri talqylandy.
Ulybrıtanııanyń memlekettik mınıstrleri Anas Sarvar, Krıs Makdonald jáne Kanıshka Naraıanmen jeke kezdesý ótti. Taraptar saýda-ınvestıtsııalyq áriptestikti tereńdetý, brıtandyq tehnologııalardy transfertteý jáne ǵylym, ınnovatsııa, jasandy ıntellekt salalarynda birlesken jobalardy júzege asyrý máselelerine basa nazar aýdardy. Munymen qosa, Alatau City-diń qalalyq ınfraqurylymyn tsıfrlandyrý perspektıvalary sóz boldy.
Bilim berý baǵyty aıasynda qazaqstandyq delegatsııa Magdalen College School basshylyǵymen kelissózder júrgizdi. Alatau City-de halyqaralyq deńgeıdegi mektep ashý, brıtandyq bilim berý baǵdarlamalaryn engizý jáne pedagogterdi birlesip daıarlaýdy uıymdastyrý múmkindigi talqylandy.
Aıta ketelik Alatau City jobasyna $1,3 mlrd ınvestıtsııa tartý kózdelgeni týraly jazǵan edik.
