Alatau City-degi ınvestıtsııalyq jobalardyń portfeli $6,9 mlrd-qa jetti
ASTANA. KAZINFORM — Qazaqstan Respýblıkasynyń Premer-mınıstri Oljas Bektenovtiń tóraǵalyǵymen ótken Alataý qalasy keńesiniń otyrysynda Memleket basshysynyń jańa qalany damytý, arnaıy quqyqtyq rejımdi júzege asyrý, ınfraqurylymdy jańǵyrtý jáne ınvestıtsııalar tartý jónindegi tapsyrmalarynyń oryndalý barysy qaraldy. Bul týraly Úkimettiń baspasóz qyzmeti málim etti.
Premer-mınıstr Prezıdent Qasym-Jomart Toqaev Alatau City jobasyn strategııalyq mańyzy bar jáne bolashaqta eldiń damýyn sapaly jańa deńgeıge shyǵarýǵa qabiletti dep aıqyndaǵanyn atap ótti.
Alatau City Authority kompanııasynyń bas atqarýshy dırektory Álisher Ábdiqadyrov atqarylǵan jumystardyń nátıjeleri týraly baıandady. Qazirgi ýaqytta Alatau City qalasynyń ınvestıtsııalyq pýly 67 jobaǵa deıin ulǵaıdy, ınvestıtsııalardyń jalpy kólemi shamamen $6,9 mlrd-ty quraıdy ári munda 55 myńǵa jýyq jumys ornyn ashýǵa múmkindik bar. PepsiCo jáne Sunny Paper kásiporyndarynyń jobalary qarqyndy júzege asyrylýda. Mars Petcare KZ, Griffin Logopark, «DanaFleks», G-Trans Service kompanııalarynyń iri óndiristik jáne logıstıkalyq jobalary boıynsha jumystar bastaldy. Jańa qalanyń flagmandyq jobalarynyń biri — Iconic Complex-tiń qurylysyna daıyndyq júrgizilýde. KIND K-Smart Town jobasy ilgeriletilýde. Jalpy aýdany 5,3 mln sharshy metr bolatyn nysandar ornalasqan 330 gektar aýmaqty keshendi túrde damytý tujyrymdamasy ázirlendi: master-jospardy jáne tehnıkalyq-ekonomıkalyq negizdemeni 2026 jyldyń sońyna deıin aıaqtaý kózdelgen.
— Investıtsııalardy odan ári tartý sheńberinde birqatar jańa iri jobalar pysyqtalýda. Olardyń qatarynda turaqty avıatsııalyq otyn jáne jasyl energetıka óndirisi salasyndaǵy Full Vision Capital jobasy, KAIST ǵylymı ınstıtýtynyń fılıalyn ashý, logıstıka, derekterdi óńdeý jáne tsıfrlyq ınfraqurylym salasyndaǵy CIMC jobalary, Sinomach joǵary tehnologııalyq agroónerkásiptik kesheni bar. Qazaq-koreı birlesken ınvestıtsııalyq qoryn qalyptastyrý, Hyundai Green Food óndiristik-logıstıkalyq keshenin salý, Iconic Tower jobasyna Lotte Hotels & Resorts brendin tartý, Doosan Enterbility-men energetıkany, Korea Airports Corporation-men qalalyq áýe utqyrlyǵyn, sondaı-aq Hyundai Motor Company-men birlesip smart-utqyrlyq pen sýtegi tehnologııalaryn damytý jónindegi jekelegen ýaǵdalastyqtarǵa qol jetkizildi, — delingen habarlamada.
Alatau Crypto City-di damytý boıynsha jumystar qarqyndy júrgizilýde. QR Ulttyq bankimen birlesip Tokenization by Default tujyrymdamasy daıyndaldy. Tokenızatsııa jobalaryna qatysýǵa qyzyǵýshylyq tanytatynyn 43 halyqaralyq jáne qazaqstandyq kompanııa rastady. 2026 jyldyń sońyna deıin tokenızatsııa jobalaryn iske qosý josparlanýda, olardyń jalpy kólemi $10 mln-ǵa jetýi múmkin.
Mınıstrler kabınetiniń dereginshe, keńes otyrysynda qalanyń ınjenerlik jáne kólik ınfraqurylymyn damytýǵa nazar aýdaryldy. 26 ınfraqurylymdyq joba qarastyrylǵan. Elektrmen jabdyqtaý salasynda Kókpa-1 qosalqy stansasyn rekonstrýktsııalaý boıynsha qurylys-montaj jumystary bastaldy. Sýmen jabdyqtaý jáne sý burý salasyndaǵy jobalardyń bir bóligi qurylys-montajdaý jumystarynyń aıaqtalý satysynda, al qalǵan jobalar boıynsha merdiger uıymdar aıqyndaldy. Jol ınfraqurylymy aıasynda 61,2 shaqyrym jolǵa ortasha jóndeý júrgizý jáne 15 shaqyrym jańa avtomobıl jolyn salý kózdelgen.
Jalpy, ınjenerlik jeliler, kólik, áleýmettik jáne tsıfrlyq ınfraqurylym ozyq qarqynmen qalyptastyrylatyn bolady. Bul jumysty turaqty qarjylandyrýdy qamtamasyz etý maqsatynda Alataý qalasynyń ınfraqurylymyn damytý máseleleri qaraldy. Aldaǵy kezeńde bul baǵyt bıýdjet qarajatyn, memlekettik-jekemenshik áriptestik tetikterin, sondaı-aq jeke jáne kvazımemlekettik ınvestıtsııalardy ushtastyrýdy kózdeıdi.
Budan bólek, jyl sońyna deıin bıznesti damytý, tsıfrlyq aktıvter jáne basqa da máselelerdi retteıtin qujattar toptamasyn qabyldaý josparlanyp otyr. ARUP Group jáne BCG halyqaralyq kompanııalaryn tarta otyryp, qalany 2040 jylǵa deıin damytýdyń strategııalyq master-jospary jáne 2055 jylǵa deıingi uzaqmerzimdi jospary ázirlenýde.
Otyrys qorytyndysy boıynsha Premer-mınıstr Alatau City qalasynyń damýyndaǵy negizgi baǵyttar boıynsha jobalardy odan ári praktıkalyq júzege asyrýdy jáne belgilengen merzimderdiń saqtalýyn qamtamasyz etýdi tapsyrdy.
Aıta keteıik, buǵan deıin Úkimet úsh jylǵa arnalǵan respýblıkalyq bıýdjet týraly zań jobasyn bekitti.
