Alatau City-degi ındýstrııalyq aımaqtar biryńǵaı ekonomıkalyq júıege biriktiriledi
ASTANA. KAZINFORM – Alatau City-de qoldanystaǵy ındýstrııalyq aımaqtardy qalanyń jańa ekonomıkalyq jáne retteýshilik júıesine ıntegratsııalaý máseleleri talqylandy.
Dóńgelek ústelge «Alataý» arnaıy ekonomıkalyq aımaǵynyń basqarýshy kompanııasy, sondaı-aq «Birlik», G-Trans Service, «GORIZONT», TULIP, Damu Logistics jáne «Istkomtrans» ındýstrııalyq aımaqtarynyń ókilderi qatysty.
Kezdesýde AEA qatysýshylaryn Alatau City rezıdenttigine kóshirý, ınjenerlik jáne kólik ınfraqurylymyn damytý, ındýstrııalyq aımaqtardy qalanyń master-josparyna engizý jáne ınvestorlar men jer paıdalanýshylar úshin bolashaq jumys sharttary qaraldy.
AEA qatysýshylarynyń Alatau City rezıdenttigine ótýi kezinde qoldanystaǵy sharttardy buzý talap etilmeıdi. Qatysýshylar úshin qazirgi sharttardy saqtaý kózdelip otyr. Tıisti normalar 2027 jylǵy 1 qańtardan bastap kúshine enip, jańa mártebege 2027 jylǵy 1 shildege deıin ótý josparlanǵan.
– Mindet – ındýstrııalyq aımaqtardyń damýyn Alatau City-degi ınfraqurylymdyq jáne retteýshilik ózgeristermen úılestirý jáne qoldanystaǵy ári jańa ınvestorlar úshin túsinikti sharttar qalyptastyrý, – delingen málimette.
Kezdesýde ınfraqurylym máselesine de erekshe nazar aýdaryldy. Indýstrııalyq alańdardy damytý úshin kásiporyndardyń qurylysyn elektr, gaz jáne sý jelilerin tartýmen, avtomobıl jáne temirjol ınfraqurylymyn damytýmen qatar júrgizý qajettigi aıtyldy.
Birqatar ındýstrııalyq alańnyń kólik qoljetimdiligi, sonyń ishinde Almaty kólik torabyn aınalyp ótetin jol salý qajettigi de talqylandy.
Sonymen qatar Alatau City-diń bolashaq master-josparynda aýmaqtardy aımaqtarǵa bólý jáne qoldanystaǵy ındýstrııalyq aımaqtardyń jańa qala qurylymyndaǵy ornyn anyqtaý tásilderi tanystyryldy. Jeke menshiktegi jáne ýaqytsha jer paıdalanýdaǵy jer ýchaskelerin esepke alý máselesi de qaraldy.
Taraptar ınvestorlarǵa usynylatyn salyqtyq preferentsııalar, basym salalardy anyqtaý, sheteldik sarapshylardy tartý jáne lıtsenzııalaý tásilderin talqylady.
Naqty aktıvterge quqyqtardy tokenızatsııalaý máselesine de nazar aýdaryldy. 2026 jyly osy baǵytta qajetti normatıvtik jáne tehnıkalyq bazany qalyptastyryp, alǵashqy pılottyq jobalardy iske qosý josparlanyp otyr.
Indýstrııalyq aımaqtardyń ókilderi ózderiniń qoldanystaǵy jáne perspektıvalyq jobalaryn tanystyrdy. Olar ınjenerlik jelilerge qosylý, kólik qoljetimdiligi, salyqtyq sharttar, jer ýchaskeleriniń mártebesi jáne AEA qatysýshylarynyń Alatau City rezıdenttigine ótý tártibi sekildi máselelerdi kóterdi.
Dóńgelek ústel qorytyndysynda taraptar atalǵan baǵyttar boıynsha birlesken jumysty jalǵastyrýǵa kelisti. Indýstrııalyq aımaqtar ókilderimen kelesi kezdesý 2026 jyldyń qazan aıyna josparlanǵan.
Aıta keteıik, Alataý qalasyn damytýǵa jasandy ıntellekt qoldanylmaq.
