Alatau City aımaqtaǵy tolyq tsıfrlanǵan alǵashqy qalaǵa aınalýǵa tıis – Prezıdent
ASTANA. KAZINFORM – Memleket basshysy Qasym-Jomart Toqaev Alataý qalasyna arnaıy quqyqtyq mártebe berýdi júktedi.
- Kelesi qadam – Alatau City-diń myqty ınstıtýtsıonaldyq negizderin qalyptastyrý. Qalany el Úkimetine tikeleı baǵynatyndaı etip, oǵan arnaıy mártebe berý týraly jarlyqty on kún ishinde ázirleý kerek. Sodan keıin jarty jyldan asyrmaı, jeke zań qabyldaý qajet. Qujatta qalany basqarý rejımi, onyń qarjylyq modeli jáne basqa da mańyzdy máseleler qamtylýǵa tıis, - dedi Qasym-Jomart Toqaev Qazaqstan halqyna Joldaýynda.
Memleket basshysynyń aıtýynsha, Alataý qalasyna beriletin arnaıy quqyqtyq mártebe – qalaǵa beriletin artyqshylyq emes, jobanyń qaǵaz júzinde qalyp qoımaı, naqty iske asýyna qajetti shara nemese qural.
- Alatau City aımaqtaǵy tolyq tsıfrlanǵan alǵashqy qalaǵa aınalýǵa tıis. Munda Smart City tehnologııalaryn qoldanýdan bastap taýarlar men qyzmet aqysyn krıptovalıýtamen tóleýge deıingi jańalyqtyń barlyǵy engizilýi kerek. Bul qala Qazaqstannyń keleshektegi kelbetin tanytpaq. Onda tehnologııalyq órleýge jáne ómir súrýge barynsha qolaıly jaǵdaı úılesim tabýy qajet, - dep tolyqtyrdy Prezıdent.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.
