Alataý aýdanynyń turǵyndary Almaty ákimine 400-den astam suraqtar qoıdy
ALMATY. QazAqparat – 9 tamyz kúni Almatynyń ákimi Baqytjan Saǵyntaev Alataý aýdanynyń turǵyndarymen kezdesti, dep habarlaıdy ákimdiktiń baspasóz qyzmeti.
Kezdesý barysynda qala ákimi megapolısti damytýdyń negizgi baǵyttary, abattandyrý, áleýmettik jáne jol-kólik ınfraqurylymyn jetildirý, medıtsınalyq qyzmettiń qoljetimdiligi, quqyqtyq tártip pen qoǵamdyq qaýipsizdikti qamtamasyz etý, jumys oryndaryn qurý týraly aıtqan.
B. Saǵyntaev qalanyń barlyq aýdandarynda sapaly medıtsınalyq qyzmettiń qoljetimdiligine erekshe nazar aýdardy. Bul mindetti júzege asyrý úshin medıtsıtsnalyq mekeme joq yqsham aýdandarda medıtsınalyq pýnktter men ambýlatorııalar ashylady ári munda ortalyq emhanalardyń dárigerleri qabyldaýlar júrgizedi.
«Budan ózge, birinshi tamyzdan bastap toqsan saıyn jyljymaly medıtsınalyq pýnktter halyqpen jumys istep jatyr»,-dedi shahar basshysy.
Sondaı-aq ol jıynda eńbekpen qamtý máselesine erekshe nazar aýdardy. Qyzmet kórsetý men servısti ekonomıka salasynda shyǵan jáne orta bıznesti qoldaý arqyly sapaly jumys oryndaryn qurýdyń keshendi sharalary ázirlengenin aıtty. Aýdandarda «Baqytty otbasy» kópbalaly analardy qoldaý ortalyqtary ashylyp, áıelder kásipkerligin damytý úshin «Іsker ana» baǵdarlamasy iske asyrylýda.
Eńbek naryǵynda jastardyń qajetti mamandyq alýlaryna kómektesý maqsatynda qala kolledjderiniń mobıldi (kóshpeli) qabyldaý komıssııalary jumys istep jatyr. «Eńbek» nátıjeli jumyspen qamtýǵa jáne jappaı kásipkerlikti damytýǵa arnalǵan memlekettik baǵdarlama aıasynda tegin oqytý qolǵa alynǵan.
B. Saǵyntaev qaýipsizdik máselesi boıynsha polıtsııanyń jaıaý jáne avtomobıl narıadtarynyń budan bylaı aýlalar men qarańǵy ýchaskelerdi baqylaýǵa alatyny týraly aıtty. Barynsha krımınaldy aýmaqtarda polıtsııanyń mobıldi pýnktteri jumys isteıdi.
«Kezdesýge kelgenderdiń barlyǵy ákimge suraqtaryn tikeleı qoıdy. Úsh saǵatqa sozylǵan kezdesý barysynda turǵyndar aýyzsha jáne jazbasha túrde 400-den astam saýaldar joldady. Almaty ákimdiginiń kóshpeli hatshylyǵy suraqtardyń barlyǵyn tirkedi, olar saraptamadan ótedi jáne tıisti sheshimder qabyldanady»,-delingen habarlamada.
