Alataý aýdanynyń qaýipti aýmaǵynda salynǵan 1400-deı úıdiń ıeleri baspanasyz qalmaıdy -Almaty ákimi
ALMATY. Shildeniń 3-i. QazAqparat /Ádilet Musahaev/ - Alataý aýdany qurylǵan kezde 5 myńǵa jýyq turǵyn qalada tirkelmegendikten, tıisti memlekettik járdemaqysyn ala almady, jumys isteýde, emdelýde, balalaryn oqytýda da múmkindikteri bolmaǵandyqtan qıyn kúnderdi keshti. Bul jaıynda Almaty qalasynyń ákimi Ahmetjan Esimov Alataý aýdanynyń eki jyldyǵyna oraı ótken merekelik sharada aıtty,
dep habarlaıdy QazAqparat.
A.Esimov ol ýaqytta turǵyndardyń kóbi zańsyz jer telimin basyp alǵandyqtaryn jáne olar bul qadamǵa eriksiz barǵandyqtaryn jetkizdi. «Jurttyń kópshiligi alaıaqtardyń aladýyna túsken edi. Qazir alaıaqtar ustalyp, zańmen jazalandy. Biraq onymen turǵyndardyń jaǵdaıy jaqsarmaıtyny belgili, sondyqtan máseleni zerttep, kóp izdenip, ony qoǵamdyq keńeste talqylap, sonyń nátıjesinde 4,5 myń zańsyz basyp alynǵan jer telimderi anyqtalynyp onyń 3 myńnan astamy zańdastyrýdyń jolyn taýyp, sheshim shyǵardyq», deıdi qala ákimi. Sonymen qatar ol qalǵan 1400-deı zańsyz salynǵan úıler qaýipti aımaqtarda ornalasqandyqtan olardy zańdastyrýǵa kelmeıtindigin aıtty. «Adamdar turýǵa qaýipti aımaqtardy aralap shyǵyp, biz taǵy bir úlken sheshimge keldik. Qalǵan turǵyndardyń biraz bóligine arnaıy qarajat bólý arqyly jańadan úı salyp, zańdastyratyn bolamyz. Basqalaryna ınvestorlardyń qarajatyna jańa úıler salynyp, «Saıaly» yqsham aýdanyndaǵy sııaqty jalǵa beriledi», dep atap ótti óz sózinde Ahmetjan Esimov.
Sondaı-aq ol «Saq qorǵany» mańyndaǵy jerlerdi Mádenıet mınıstrliginiń kelisimin alǵannan keıin ǵana zańdastyratyndyǵyn aıtyp ótti.
