Alataý aýdanynyń birqatar eldi mekenderinde jaryq pen aýyz sý máselesi áli de ózekti

ALMATY. QazAqparat - Alataý aýdanyna jańa qosylǵan «Rahat-Mádenıet», «Terekti», «Alǵabas» aýdandarynda elektr qýaty men aýyz sý, jol, káriz júıesi máselesi tolyq sheshimin tapqan joq, dep habarlaıdy QazAqparat tilshisi.

Bul týraly búgin Almaty qalasy Óńirlik kommýnıkatsııalar qyzmeti alańynda «QazAqparat» tilshisiniń saýalyna jaýap bergen Alataý aýdanynyń ákimi Shahmardan Ryspaev aıtty.

«Búgingi tańda jobalyq-smetalyq qujattama daıyndaý boıynsha qalalyq energetıka basqarmasymen birlesip jumys istep jatyrmyz. Bul shaǵyn aýdandarda sý, káriz, elektr júıesi men jol máselesi áli de bar. Mysaly, «Terekti» yqsham aýdanyna tartylǵan elektr qýaty Qarasaı aýdanynan alynady. Almaty oblysyna qarasty elektr jelilerin óz aýdanymyzǵa aýystyrý máselesi boıynsha jumystar júrip jatyr. Toq kerneýiniń az bolýy da sondyqtan», - dedi aýdan ákimi.

Aýdan ákiminiń esebinde jalpy, aýdan boıynsha turǵyndardy úzdiksiz elektr qýatymen qamtamasyz etý maqsatynda, «13-14 aýmaq» yqsham aýdandarynda uzyndyǵy 11,8 shaqyrymdy quraıtyn elektr jelileri salynyp jatqany baıandaldy. Sonymen qatar, ákim búgingi kúni Alataý aýdanynyń 13 yqsham aýdanynda aýyz sý men káriz qubyrlaryn tartý jumystary da júrip jatqanyn aıtty.

«Naqtyraq aıtqanda, «Áıgerim-1,2», «Qarasý», «Uljan-1,2», «Darhan-Baıbesik», «Shańyraq-1,2», «Trýdovık», «AZTM-Alǵabas», «14 aýmaq», «Aqbulaq», «Ójet» jáne «Kók Qaınar» yqsham aýdandaryna qubyr tartylyp jatyr. Qubyrlardyń jalpy uzyndyǵy 381 shaqyrymdy quraıdy, onyń ishinde aýyz sý - 200, káriz - 180,4 shaqyrym, bıýdjetten bólingen qarajat somasy 16 mlrd. 608 mln. teńge», - dedi aýdan ákimi.

BAQ ókilderi aldynda esep bergen Shahmardan Ryspaev ózi basqaratyn aýdanynda atqarylǵan jumystardyń nátıjesine toqtaldy.

«Alataý aýdanynyń salyq túsimderi 9 jylda 6,5 mllıard teńgeden 26 mllıard teńgege jetti. Búgingi kúni memlekettik bıýdjetke 25 mlrd. 735 mln. teńge túsip, jospar 95 paıyzǵa oryndaldy. Respýblıkalyq bıýdjetke 14 mlrd. 790 mln. teńge túsip, jospar 87 paıyzǵa oryndaldy. Jergilikti bıýdjetke 10 mlrd 946 mln teńge tústi, berilgen jospar 109 paıyzǵa oryndaldy», - dedi aýdan ákimi.

Aýdan ákimi jeke ınvestıtsııa esebinen «Rahat-Mádenıet» yqsham aýdanynda 100 orynǵa arnalǵan balabaqsha qurylysy bastalǵanyn, «Alataý sıtı» turǵyn úı kesheninde 350 oryndyq balabaqsha salynyp jatqanyn aıtty.

Aıta keteıik, búgingi kúni Alataý aýdanynda 23 yqsham aýdan bar, jalpy jer aýmaǵy - 10 495 gektar. Aýdanda resmı esep boıynsha 22 myńnan astam halyq turady.

Aýdanda ındýstrııaldy-ınnovatsııalyq damý» memlekettik baǵdarlamasy aıasynda 40 joba maquldanǵan.