Alataý aýdanynda zańsyz salynǵan úılerdi zańdastyrý máselesi alǵashqy toqsanda aıaqtalady - aýdan ákimi
ALMATY. Qańtardyń 26-sy. QazAqparat /Erlik Erjanuly/ - Almaty qalasynyń Alataý aýdanynda 2008 jyly júrgizilgen túgendeý kezinde adamdar turyp jatqan zańsyz salynǵan 5423 úı anyqtalǵan bolatyn.
Qazirgi tańda onyń 2675-i zańdastyryldy. Ony aýdan ákimi Baǵdat Mánizorov búgin Áleýmettik shıelenisterdi qarastyrý men sheshý jónindegi qoǵamdyq keńestiń otyrysynda aıtty, dep habarlaıdy QazAqparat.
"Biz túgendeýdi 2008 jyly bastap, 2009 jyldyń basynda aıaqtadyq. Odan keıin qala ákimi men qalalyq máslıhatpen birge zańsyz salynǵan úılerdi zańdastyrý jóninde sheshim qabyldadyq. Qazirgi tańda 5423 úıdiń 2675-i zańdastyryldy. Sonyń nátıjesinde 15-16 myń adam qala turǵyny mártebesine ıe boldy. Naqtyraq aıtqanda 1609-y jer telimine memlekettik akti aldy. Aldaǵy 1-2 aıdyń ishinde zańsyz salynǵan úılerdi zańdastyrýǵa núkte qoıylady", deıdi Alataý aýdanynyń ákimi, Qoǵamdyq keńes múshesi Baǵdat Mánizorov. Onyń aıtýynsha, zańsyz salynǵan 5423 úıdi zańdastyrý jónindegi komıssııaǵa 6 myńǵa jýyq qujat tústi. Olardyń arasyndaǵy aıyrmashylyq - keıbir azamattardyń óz qujattaryn eki ret, al taǵy bireýlerdiń jer telimin zańdastyrýǵa ǵana qujat tapsyrýynan oryn aldy. Zańdastyrýǵa kelmeıtin 1,5 myń úı arnaıy qorǵalatyn aımaqqa jáne zıratqa jaqyn salynǵan úıler. Bul másele aldaǵy ýaqytta jeke qaralýy kerek.
