«Alatau» arnaıy ekonomıkalyq aımaǵyna port statýsy berildi

ASTANA. KAZINFORM — Úkimet «Alatau» arnaıy ekonomıkalyq aımaǵyn qurý týraly qaýlyǵa ózgerister engizdi. 

Qujattyń jańa redaktsııasyna sáıkes, jańartylǵan shekaralar jeke josparmen bekitilip, «Alatau» AEA Qonaev jáne Alataý qalalarynyń, sondaı-aq Almaty oblysynyń Talǵar jáne Іle aýdandarynyń aýmaqtaryn qamtydy. 

Sonymen qatar aımaq resmı túrde porttyq arnaıy ekonomıkalyq aımaq retinde belgilendi. Onyń jalpy aýmaǵy 98 982,98 gektar. Aýmaǵyna óńirdiń kólik-logıstıkalyq áleýetin damytýǵa arnalǵan ýchaskeler, onyń ishinde áýejaılardyń jobalyq qyzmet kórsetý aımaqtary kiredi.

Qujatta 2047 jylǵa deıingi aımaqty damytýǵa arnalǵan nysanaly ındıkatorlar da belgilengen. Atap aıtqanda, jalpy ınvestıtsııalar kólemi 1666,64 mlrd teńge. Onyń ishinde sheteldik ınvestıtsııalar — 1028,32 mlrd teńge, al otandyq ınvestıtsııalar — 638,32 mlrd teńge.

Oǵan qosa, AEA aýmaǵynda óndiriletin taýarlar men kórsetiletin qyzmetterdiń jalpy kólemi 1759 mlrd teńgege jetýi tıis. Qatysýshy kompanııalar sany 53 bolady dep josparlanǵan. Arnaıy ekonomıkalyq aımaqta 17 366 jańa jumys orny qurylýy kózdelgen. Al osy aýmaqta óndiriletin ónimdegi qazaqstandyq úles 91% deńgeıinde aıqyndalǵan.

Buǵan deıin Atyraýda 450 gektarlyq jańa arnaıy ekonomıkalyq aımaq qurylǵanyn jazǵanbyz.