Alataý, Almaty jáne Qonaev arasynda LRT salynýy múmkin
ASTANA. KAZINFORM — Almaty metrosy ázirge Alataý qalasyna deıin sozylmaıdy. Úkimet bul baǵytta metronyń ornyna LRT jelisin damytýdy josparlap otyr. Bul jóninde QR Premer-mınıstriniń orynbasary Qanat Bozymbaev málimdedi, dep habarlaıdy Kazinform tilshisi.
Memleket basshysynyń Alatau City jobasyna qatysty tapsyrmalaryn iske asyrý jónindegi baspasóz konferentsııasynda vıtse-premer Alataý halqynyń sany azdyǵyna baılanysty bul baǵytqa metro salý ázirge tıimsiz ekenin aıtty.
— Qazir bul týraly aıtýǵa áli erte dep oılaımyn. Alatau City-diń halqy resmı túrde 50 myńnan sál ǵana asady. Sondyqtan metrony bul qalaǵa deıin uzartýdyń ázirge qajettiligi joq. Bas josparǵa sáıkes, Almaty, Alataý jáne Qonaev qalalarynyń arasynda LRT jelisi júrgiziledi. Sonymen qatar, áýe jastyqshasymen júretin poıyz sekildi ózge de nusqalar qarastyrylyp otyr. Qazir álemniń úzdik mamandarymen jumys istep jatyrmyz, — dedi Qanat Bozymbaev.
Onyń sózinshe, Úkimet úsh qala arasyndaǵy kólik baılanysy úshin eń tıimdi ári shyǵyny az sheshimdi tańdamaq.
Sonymen birge, bolashaqta turǵyndar sany artqan jaǵdaıda da boljam boıynsha, kólik keptelisi kúsheımeıdi.
— Bas jospardy Subana Jurong kompanııasy ázirledi. Bul — Sıngapýrdy jáne basqa da kóptegen eldi damytýǵa qatysqan iri kompanııa. Qazir jospar, ýrbanıstıka men kólik ınfraqurylymyn taǵy bir myqty kompanııa naqtylap jatyr. Biz basqa ınvestıtsııalyq jobalarda ketken qatelikterdi de eskeremiz. Mundaı sátsiz tájirıbeni mindetti túrde nazarǵa alý kerek. Sondyqtan jolda shekten tys keptelis bolady dep oılamaımyz, — dep túsindirdi vıtse-premer.
Aıta keteıik, Almaty metrosynyń beketterinde platformalyq esikterdi ornatýǵa 7 mlrd teńge jumsalatynyn jazǵanbyz.
Kamıla Taıtóleý
