Alataý aqparattyq tehnologııalar parkinde qazir barlyq álemdik aqparattyq kompanııalardyń ókildikteri bar - S. Ahmetov
ALMATY. 3 jeltoqsan. QazAqparat - Almaty qalasyndaǵy Alataý aqparattyq tehnologııalar parki erkin ekonomıkalyq aımaǵyn keńeıtý máselesi qazir Úkimettiń kún tártibinde tur. Bul týraly búgin Almatyda ótip jatqan І Halyqaralyq ınvestıtsııalyq forýmynda aıtyldy.
«Osydan 4 jyl buryn Aqparattyq tehnologııalar parki erkin ekonomıkalyq aımaǵyn qurǵan kezde 150 gektar jerge ınvestıtsııa men kásiporyndardy qalaı tartamyz dep oılaǵan ıedik. Qazir onda bos jer joq. Investorlar jaǵdaı jasaıtynymyzǵa sendi. Endi aldymyzda aqparattyq tehnologııalar parkin keńeıtý máselesi tur. Álemge áıgili kompanııalar qazaqstandyq kompanııalarmen birlesip óz qyzmetterin júzege asyrýda. Onda barlyq álemdik aqparattyq kompanııalardyń ókildikteri bar. Jańa ónimder tek Qazaqstanǵa ǵana qajetti bolmaıdy», - dedi QR Premer-Mınıstri Serik Ahmetov. Úkimet basshysynyń aıtýynsha, qýatty shyǵarmashylyq áleýeti bar Almaty úshin Aqparattyq tehnologııalar parkiniń mańyzy zor. Onda ınnovatsııalyq tehnologııalardyń transferti júzege asýda.
