Alataý ákimdigi dárigerlerge arnalǵan qyzmettik turǵyn úıdegi jaǵdaıǵa qatysty túsinik berdi
QONAEV. KAZINFORM – Alataý qalasynyń ákimdigi qyzmettik turǵyn úıdiń jaı-kúıine narazy bolǵan dárigerdiń ótinishine qatysty túsinik berdi.
Áleýmettik jeli qoldanýshysy Alataýǵa medıtsına kadrlary tapshy kezde dáriger bolyp jumysqa ornalasqan. Alaıda onyń aıtýynsha, usynylǵan qyzmettik páterdiń jaǵdaıy kóńil kónshitpeıdi.
Vıdeodan kireberistegi qabyrǵalardyń jartylaı opyrylyp, jazýlarmen bylǵanǵany, sanıtarlyq toraptardyń da jaǵdaıy máz emes ekenin kórýge bolady.
– Memleket rasymen de mamandardy, ásirese densaýlyq saqtaý salasynda, óńirlerge tartqysy kelse, onda turǵyn úı jaǵdaıy qaýipsiz, ómir súrýge qolaıly, eń quryǵanda sanıtarlyq talaptarǵa saı bolýǵa tıis, - dep jazdy ol.
Alataý qalasynyń turǵyn úı-kommýnaldyq sharýashylyq bólimi men turǵyn úı ınspektsııasy bul jazbaǵa ún qatyp, ótinish ıesine Jetigen shaǵynaýdanynda usynylǵan páter bastapqyda jóndeýden keıin berilgenin habarlady. Alaıda dáriger bul nusqadan qabat men úıdiń ornalasqan jerine baılanysty bas tartqan.
Balama retinde oǵan buryn bos turǵan, negizgi usynys bolyp tabylmaıtyn basqa turǵyn úı nusqasy kórsetilgen.
– Balansqa alynǵan úıler 1970 jyldary salynǵan. Qazirgi ýaqytta kezekte turǵan azamattar úshin olardy kezeń-kezeńimen jóndeý jumystary júrgizilip jatyr. Sonymen qatar qazirgi ýaqytta vıdeo avtory Jetigen shaǵynaýdanyndaǵy memlekettik medıtsınalyq uıymnyń qyzmetkeri emes ekenin atap ótemiz. Alataý qalasy damýdyń bastapqy kezeńinde, turǵyn úı qoryn qalyptastyrý jumystary jalǵasyp jatyr, - dep habarlady vedomstvo.
Eske salaıyq, buǵan deıin Qazaqstanda «Alataý qalasynyń arnaıy mártebesi týraly» Konstıtýtsııalyq zań jobasy ázirlengenin jazǵanbyz.