«Alataý» AEA men Innovatsııalyq tehnologııalar parki ózge memorgandarǵa berildi

ASTANA. QazAqparat - QR Investıtsııalar jáne damý mınıstrliginiń sheshimimen eki Arnaıy ekonomıkalyq aımaq ózge memlekettik organdarǵa berildi, dep habarlaıdy QazAqparat tilshisi.

Eske sala ketsek, Prezıdent Nursultan Nazarbaev 2018 jyldyń qańtar aıynda Qazaqstan halqyna arnalǵan Joldaýynda Almaty qalasyndaǵy «Alataý ınnovatsııalyq tehnologııalar parki» AEA damytý máselelerin qaıta qaraýdy tapsyrǵan edi.

«Alataý ITP ıdeıasy men qurylysy 2003 jyly bastalǵan. Arada ótken 15 jylda ómirimizde kóp nárse ózgerdi. Qazir tsıfrlandyrý ómirdiń barlyq salalaryna enip keledi, qalalardyń ózi qarqyndy ósý kózine aınaldy. Sondyqtan, mundaı qaıta qurýlardyń qajettiligi óte ózekti bolyp otyr», - dep atap ótti QR Investıtsııalar jáne damý vıtse-mınıstri Tımýr Toqtabaev Úkimet úıinde ótken baspasóz máslıhatynda.

Úkimet tıisti taldaý jumystaryn júrgizip, ınnovatsııalyq kásiporyndar úshin jeńildetilgen rejimde jumys isteıtin ekonomıkalyq aımaqty  Almaty qalasynyń ákimdigine berýdi uıǵarǵan.

Sondaı-aq, vıtse-mınıstr AEA basqarýshy kompanııasy - «Innovatsııalyq tehnologııalar parki» derbes klasterlik qorynyń QR Investıtsııalar jáne damý mınıstrliginen QR Aqparat jáne kommýnıkatsııalar mınıstrligine beriletinin málimdedi.

«Innovatsııalyq tehnologııalar parki (ITP) jobalarynyń 80 protsenti ekonomıkany tsıfrlandyrý men tsıfrly eksportqa baılanysty. Onyń ústine, QR Aqparat jáne kommýnıkatsııalar mınıstrligi «Tsıfrlyq Qazaqstan» memlekettik baǵdarlamasyn júzege asyrýdyń negizgi úılestirýshi organy bolyp otyr. Sondaı-aq, «ITP» derbes klasterlik qory zańnamada bekitilgen jer qoınaýyn paıdalanýshylardyń ǵylymı-zertteý jumystaryna bóletin qarjynyń 1 protsentin paıdalanýdy jalǵastyrady», - dep óz sózin tolyqtyrdy vıtse-mınıstr.

9 aqpan kúni Prezıdent Nazarbaev elimizdegi barlyq arnaıy ekonomıkalyq aımaqtardyń (AEA) jumystaryna tekserý júrgizýdi tapsyrdy.