Alataý 2 mıllıonǵa jýyq turǵyny bar qalaǵa aınalady
ASTANA. KAZINFORM – Alataý qalasy aldaǵy jyldary Sıngapýr men Shenchjen sekildi halyqaralyq tehnologııalyq ortalyqqa aınalýy múmkin. Bul týraly Jibek Joly radıosynda Alatau City Authority uıymy bas atqarýshy dırektorynyń orynbasary Baıan Qońyrbaev habarlady.
Jańa formattaǵy qala
Alataý Qazaqstandaǵy arnaıy ekonomıkalyq aımaqtar men ındýstrııalyq parkterden erekshe. Sebebi bul joba belgili bir salany damytýǵa ǵana emes, ómir súrýge, jumys isteýge jáne jańa tehnologııalardy engizýge qolaıly orta qalyptastyrýǵa baǵyttalǵan.
— Negizgi maqsat — odan tolyqqandy jańa qala qalyptastyrý, — dedi Baıan Qońyrbaev.
Onyń sózinshe, qala tehnologııa, bilim berý jáne ınnovatsııany toǵystyratyn birtutas ekojúıe retinde damıdy. Alataýdy basqarý júıesi de ózgeshe bolady. Qalanyń damýyna jaýapty uıymdy bas atqarýshy dırektor basqarady, al strategııalyq sheshimderdi Prezıdent bekitetin keńes qadaǵalaıdy.
— Negizgi maqsat — ashyqtyqty qamtamasyz etip, basqarý tıimdiligin arttyrý, — dedi ol.
Spıkerdiń aıtýynsha, mundaı basqarý modeli Dýbaı, Sıngapýr jáne Shenchjen qalalarynda tıimdiligin dáleldegen.
2050 jylǵa deıingi jospar
Qalany damytý 30 jyldyq uzaqmerzimdi josparǵa negizdeledi. Sonymen qatar 15 jyldyq damý strategııasy men qalanyń ınfraqurylymyn aıqyndaıtyn master-jospar ázirlenip jatyr. Qujattardy jyl sońyna deıin bekitý josparlanǵan.
Boljam boıynsha, 2050 jylǵa qaraı Alataý halqy 78 myńnan 1,8 mıllıon adamǵa deıin ósedi. Tehnologııalyq óndiristerde jańa jumys oryndary artady.
— Ǵylym men tehnologııaǵa negizdelgen óndiristerdi damytý nátıjesinde 1 mıllıonǵa jýyq jańa jumys orny qurylady, — dedi Baıan Qońyrbaev.
Master-josparǵa sáıkes, qala tórt aýdanǵa bólinbek. Olar — qarjyǵa baǵyttalǵan Gate City, medıtsına, bilim jáne tehnologııalar shoǵyrlanatyn Golden City, óndiristik Manufacturing aımaǵy jáne Green District jasyl aýdany.
— Qala aýmaǵynyń 50 paıyzdan astamy jasyl aımaq bolady, — dedi spıker.
Investıtsııa men jańa múmkindikter
Qazirdiń ózinde jobaǵa Sıngapýr, Qytaı, Koreıa Respýblıkasy men Taıaý Shyǵys elderinen jalpy quny 2 trıllıon teńgeden asatyn 53 ınvestıtsııalyq joba tartylǵan.
Spıkerdiń pikirinshe, ınvestıtsııanyń tıimdiligi qarjy kólemimen emes, ınvestorlar ákeletin tehnologııa arqyly ólshenedi.
— Bizdiń jaǵdaıda ınvestorlar — smart money. Negizgi mindet — osy ınvestıtsııalyq kapıtal aǵynyn tıimdi uıymdastyrý, — dedi ol.
Alataýdyń taǵy bir artyqshylyǵy — onyń ornalasqan jeri. Qala Qytaı men Eýropany jalǵaıtyn mańyzdy tranzıttik baǵyttyń boıynda tur. Sondyqtan joba Qazaqstan men Ortalyq Azııa úshin ǵana emes, Azııa men Batysty baılanystyratyn tsıfrlyq hab retinde tartymdy.
Baıan Qońyrbaevtyń pikirinshe, Alataý jańa tehnologııalar men tsıfrlyq ekonomıkany damytýǵa arnalǵan tájirıbe alańyna aınalýy tıis.
— Bizdiń maqsat — qalany nólden bastap quryp, el múddesine saı tıimdi basqarý júıesin qalyptastyrý. Keıin bul tájirıbeni basqa óńirlerge de taratýǵa bolady, — dep túıindedi ol.
