Alashtyń birtýar azamaty Smaǵul Sádýaqasovtyń máıitiniń kúli Astanaǵa jetkizildi
ASTANA. 21 qańtar. QazAqparat /Arman Asqarov/ - Búgin, qańtardyń 21-i kúni tańǵy saǵat 7:15-te «Máskeý - Astana» baǵytyndaǵy №874 ushaqpen Alashtyń birtýar azamaty, memleket jáne qoǵam qaıratkeri Smaǵul Sádýaqasovtyń máıitiniń kúli elordaǵa jetkizildi.
Osyǵan oraı áýejaı ǵımaratynda qaraly jıyn ótip, ómiri gúl, denesi kúl bolyp elge oralǵan Smaǵul Sádýaqasulynyń árýaǵyna quran baǵyshtaldy. Aqyndar jyr joldaryn arnap, ǵalymdar jyly estelikter aıtty. «Búgingi bizdiń Táýelsizdigimiz ol - Smaǵul Sádýaqasov sııaqty el azamattary atqarǵan eńbektiń ádil baǵasy. Onyń súıegi hrıstıan qorymynda jatty. Bul bizdiń ǵurpymyzǵa qaıshy. Sondyqtan biz Smaǵul Sádýaqasovtyń súıeginiń kúlin onyń ózi ańsaǵan Táýelsiz Qazaqstannyń elordasy - Astana qalasyna jetkizip otyrmyz. Bul - halyqtyń armany. Endigi mindet - biz Smaǵuldyń eńbekterin oqyp, Smaǵuldy taǵy paryqtaýymyz qajet. Astana Smaǵuldy tanıtyn, Smaǵulmen maqtanatyn elorda bolady dep senemin», - dedi óz sózinde bastamshyl tobynyń ókili, professor Dıhan Qamzabekuly. Osydan keıin Smaǵul Sádýaqasovtyń máıitiniń kúli qoıylǵan kortej Táýelsizdik dańǵylynyń boıymen ótti.
Astana qalasynyń Sádýaqas qajy Ǵylmanı meshitiniń bas ımamy Baqtybaı Beısenbaevtyń habarlaýynsha, jerleý orny anyqtalǵansha, Smaǵul Sádýaqasovtyń máıitiniń kúli osy meshittiń arnaıy bólmesinde saqtalady. «Máıit kúlin jerleý orny anyqtalǵannan keıin, oǵan duǵa oqylyp, musylmansha jerleý rásimi ótkiziledi», - deıdi B.Beısenbaev.
Aıta keteıik, jaqynda Astana qalasynyń bir top ǵalymdary Máskeý janyndaǵy Don zıratynyń ǵımaratynda arnaıy ydysta saqtalyp kelgen Smaǵul Sádýaqasovtyń máıitiniń kúlin týǵan jerine qaıtarý máselesin kótergen bolatyn. Endi, mine, araǵa 77 jyl salyp, «Elim!» dep eńirep ótken qazaq jastarynyń kóshbasshysy, 25 jasynda Qazaq KSR-nyń Oqý-aǵartý mınıstri bolǵan azamat, Goloşekınniń genotsıdine qarsy shyǵyp, opat bolǵan Smaǵul Sádýaqasovtyń súıegi týǵan jeri - Qazaq dalasyna jetkizilip otyr.
