Alashordanyń 95 jyldyǵy qalaı atalyp ótiledi?
ASTANA. 7 qarasha. QazAqparat - Bıylǵy jeltoqsanda Alash partııasy men Alashorda ókimetiniń qurylǵanyna 95 jyl tolady.
Osyǵan oraı, búgin Parlament Májilisiniń jalpy otyrysynda depýtat Nurlan Jazylbekov ulttyq táýelsizdiktiń bastaýynda turǵan Alashordanyń mereıtoıyn keńinen atap ótý týraly másele kóterdi.
"Alash armany - búgingi táýelsiz Qazaqstan. Endeshe biz árbir azamat 100 jyl burynǵy ulttyq uly ıdeıanyń búgingi táýelsiz Qazaqstannyń negizi retinde berik ornyǵýyna atsalysýǵa tıispiz. Óıtkeni, alash ıdeologııasy - ulttyq ıdeologııa. Ol otanshyldyqqa, memleketshildikke, birlikke úndeıdi», - deıdi N. Jazylbekov.
Depýtattyń aıtýynsha, búgingi táýelsiz Qazaqstannyń bastaýynda turǵan, qalyń qazaqtyń ulttyq sanasyn kótergen alash arystaryn ardaqtaý sharalary negizsiz keshigip otyr.
«Alash arystarynyń rýhyn jas urpaqqa sińirý úshin buǵan memleket keshendi túrde basa nazar aýdarýy tıis. Alashtyń 90 jyldyǵy jergilikti deńgeıde ǵana ataldy. Aldaǵy 95 jyldyqty qalaı atap ótpekpiz? Óıtkeni, Alash ıdeıasy, Alashtyń isi - ol jeke uıymnyń, jeke partııanyń ǵana menshigi emes. Alash - táýelsiz Qazaqstannyń bastaýynda turǵan tolyqqandy ókimet pen saıası partııa. Sondyqtan da, Alash týraly mektep oqýlyqtaryna tolyqqandy aqparattar qamtylýy, Alash kósemderiniń eskertkishteri eldiń barlyq óńirlerinde ornatylýy, kitaptar men fılmder kóptep shyǵarylýy tıis. Joǵary oqý oryndarynda alash ıdeıasyn oqytý júıesi jolǵa qoıylýy shart. Alashtyń ordasy «Alash qalasy» atalǵan qazirgi Semeıde Ertistiń sol jaǵalaýyndaǵy Alashorda ókimeti men partııasy jaıǵasqan úıge eskertkish taqta ornatyp, ol úıdi murajaıǵa aınaldyrsaq ıgi. Osynyń barshasy kezek kúttirmeıtin máni zor másele. Túpteı kelgende alash ıdeıasy búgingi táýelsiz Qazaqstannyń da basty ıdeıasy bolýy shart», - dedi ol.
