Alashordalyqtar bilim bergen ǵımarat óner murajaıyna aınaldy

ASTANA. KAZINFORM – Astanada 1600-den astam ulttyq mýzykalyq aspap qoıylǵan mýzeı ashyldy. Basshylyq murajaı ornalasqan ǵımarattyń qundy ekenin aıtady.

— Bir ornalasqan ǵımarattyń ózi 1 ǵasyrdan astam ýaqyt buryn salynǵan. Kezinde musylmandardyń medresesi bolǵan eken. Bizdiń alashordalyqtar da sol jerde sabaq bergen. Ózimiz úshin baǵasy joǵary, qundy ǵımarat. Sony ary qaraı rýhanı-mádenı dúnıemen ushtastyryp ketý bizge jaqsy serpin berip, jaýapkershilik artty, — deıdi Baıandy Saharııauly «Búgin LIVE» baǵdarlamasyna bergen suhbatynda.

Jańadan ashylǵan óner mýzeıi basqa murajaılardan ózgerek.

— Mýzeı dese, kóz aldymyzǵa standartty mýzeı elesteıdi. Bizde aqparattyń berilýi men kelgen qonaqqa tanystyrý esh jerde qaıtalanbaıtyn, kreatıvti baǵytta jasaldy. Kez kelgen adam mýzeıge kelip, aspapty ustap, oınap ta kóre alady. Tipti sondaǵy sheberler men mýzykanttarmen birge jasalý jolyn da tamashalap, erekshe kúıge bólenip qaıtady. Murajaıda qol tıgizýge bolmaıtyn eksponattar da bar. Biraq biz olardyń kóshirmelerin de jasap qoıyp jatyrmyz, — deıdi óner mýzeıiniń basshysy.