«Alashqa qaýip Aýǵannan aýyp kelmesin» - respýblıkalyq basylymdarǵa sholý
***
Memleket basshysy Nursultan Nazarbaev álemdik daǵdarystan keıingi elimizdiń áleýmettik-ekonomıkalyq turaqty damýyn qamtamasyz etý úshin Úkimetke jyl saıynǵy 7 paıyzdyq ornyqty damýǵa qol jetkizýdi tapsyrǵan bolatyn. Osy aptanyń ishinde ótken Úkimet otyrysynda el damýynyń on aılyq qorytyndysy qaralyp, Elbasy alǵa qoıǵan mindettiń múltiksiz oryndalyp kele jatqandyǵy atap kórsetilgen-di. Mine osyǵan oraı «Egemen Qazaqstan» gazetinde «Turaqtylyqtyń tamasha kórinisi» degen taqyryppen kólemdi maqala jarııalandy. «Sonymen, elimizdiń áleýmettik-ekonomıkalyq damýynyń on aılyq qorytyndysy jaǵdaıdyń jaqsaryp kele jatqandyǵyn, Elbasynyń ekonomıkalyq damýdy 7 paıyzdan tómendetpeý jónindegi tapsyrmasynyń oryndalýda ekendigin kórsetip berdi. Endi osy qarqyndy jyl sońyna deıin ustap otyrý qajet. Sonda bul el Táýelsizdiginiń 20-shy jylynyń ózindik bir belesi bolyp tabylmaq», - dep jazady basylym.
«Qazaqstan Prezıdenti, «Nur Otan» HDP Tóraǵasy Nursultan Nazarbaev tórtinshi shaqyrylǵan Parlament Májilisin taratý jáne Májilis depýtattarynyń kezekten tys saılaýyn taǵaıyndaý týraly Jarlyqqa qol qoıdy. Saılaý 2012 jyldyń 15 qańtaryna belgilendi», - dep jazady «Egemen Qazaqstan» gazeti búgingi sanyndaǵy «Nur Otan» saılaýǵa daıyn» degen taqyryptaǵy maqalasynda. Basylymnyń atap ótýinshe, «Nur Otannyń» shtaby qurylyp, ony partııa Tóraǵasynyń birinshi orynbasary Nurlan Nyǵmatýlın basqarady. «Nur Otan» partııasy barlyǵy 16 aımaqtyq, 210 qalalyq jáne aýdandyq saılaýaldy shtabtaryn quratyn bolady. Saılaý kompanııasynyń naqty josparyn jasaý jáne zań talaptaryna saı bolýyn baqylaý jumystarymen respýblıkalyq shtab aınalysady.
***
«Alash aınasy» gazetiniń búgingi sanyndaǵy «Alashqa qaýip Aýǵannan aýyp kelmesin» atty maqalada sońǵy kezderi Aqtóbe, Atyraý, Tarazda birinen soń biri tizbektelgen lańkestik áreketter memleket pen qoǵamnyń, dinniń ózara baılanysyn shynaıy zerdeleýdi talap etip otyrǵandyǵy jazylady. Gazet tilshisi lańkestiktiń týyndaýy, oǵan yqpal etýshi faktorlardy zerdeleı kele, sarapshylar pikirine júginedi. Máselen, saıasattanýshy Dosym Sátpaevtyń aıtýynsha, 2014 jyly AQSh áskerin Aýǵanstannan áketken jaǵdaıda Qazaqstanda lańkestik qaýip-qater kúsheıe túsýi ábden múmkin. Al sarapshy Marat Shıbutovtyń pikirinshe, elimizdegi lańkestik áreketter taktıkasyna qaraı daǵystandyq, sheshendik, ıraktyq jáne latynamerıkandyq túrlerge uqsas bolyp keledi eken. Qazaqstanda taktıkalyq jaǵynan eń yqtımaly daǵystandyq ádis kórinedi.
Sondaı-aq osy basylymdaǵy «Kedendegi kermeden aýrý qalaı ótip júr» degen maqaladan «ımportnyı» aýrý dep aıdar taǵylǵan, ǵasyr derti - VICh/SPID-pen kúres aımaqtarda soraqy deńgeıde ekendigimen tanys bola alasyzdar. Onda elimizge syrttan kelgenderdiń kóbisi meken-jaıy naqty bolmaǵandyqtan, mundaı aýrýdan tekserile bermeıtindigi, osy iske bıýdjetten bólingen aqshanyń talan-tarajǵa túsip jatqandyǵynan habardar bolasyzdar. Máselen, Ońtústik Qazaqstan oblystyq SPID ortalyǵy bas dárigeriniń orynbasary Qojahmet Mashırov: «Oblysta aǵza ımmýnıteti tapshylyǵy vırýsyna shaldyqqandardyń sanynyń kóbeıýine sheteldikter úles qosyp otyr. Aty jaman aýrýǵa tusalǵan shetel azamattarynyń 71,9 paıyzy ózbekstandyqtar, 15,7 paıyzyn reseılikter quraıdy. Qalǵandary Qyrǵyzstan, Tájikstan, Túrikmenstan, Ýkraınadan kelgender», - depti.
***
«Almatyda Táýelsiz memleketter dostastyǵyna múshe memleketter Qorǵanys mınıstrleri keńesiniń 61-májilisi bolyp ótti. TMD elderiniń Qorǵanys mınıstrleri túgel qatysqan alqaly jıynda dostastyq elderiniń áskerı saladaǵy yntymaqtastyǵyn damytýǵa baılanysty 20-dan astam mańyzdy da ózekti máseleler jan-jaqty talqylandy», - dep jazady «Aıqyn» gazeti. Basylymnyń ata ótýinshe, jıyn qorytyndysynda aldaǵy jyly áskerı salada atqarylýy tıisti ıgilikti sharalardy júzege asyrýdyń naqty jospary qabyldanyp, májiliske qatysýshylar birlesken málimdemege qol qoıǵan. Maqala «TMD áskerı salada birlesip áreket etýi tıis» degen taqyryppen basyldy.
***
«Kazahstanskaıa pravda» gazetiniń jazýynsha, Memleket basshysy Nursultan Nazarbaev Frantsııada aýyr atletıkadan ótken álem chempıonatynda tamasha jeńiske qol jetkizgen qazaqstandyq sportshylar Ilıa Ilın men Zýlfııa Chınshanloǵa quttyqtaý jedelhatyn joldady. Máselen, Elbasynyń I.Ilınge joldaǵan quttyqtaýynda: «Siz óz jeńimpazdaryn, týǵan elin maqtan tutatyn mıllıondaǵan otandastarymyzdyń úmitin kezekti ret aqtadyńyz. Qazaqstannyń sport derjavasy retindegi mártebesi taǵy bir ret dáleldenip, bedeldi álemdik básekede týymyz kókte jelbiredi, ánuranymyz shyrqaldy. Sizdiń jeńisińiz búkil qazaqstandyqtarǵa Táýelsizdik mereıtoıy qarsańyndaǵy tamasha tartý boldy», - delingen.
