Alash jurty Oral Muhamedjanovty aqtyq saparǵa shyǵaryp saldy
ASTANA. 17 qazan. QazAqparat - Búgin Alash jurty qaımana qazaqtyń qabyrǵasyn qaıystyryp, aýyr naýqastan kóz jumǵan memleket jáne qoǵam qaıratkeri - Oral Muhamedjanovty aqtyq saparǵa shyǵaryp saldy, dep habarlaıdy 24.kz saıtynan.
Qaraly jıynǵa zııaly qaýym, bılik ókilderi, Oral Baıqonysulynyń úzeńgiles áriptesteri, shákirtteri men jerles dostary qatysty. Qoshtasýda QR Parlament Májilisiniń tóraǵasy Nurlan Nyǵmatýlın: «Oral Baıqonysuly - qandaı qyzmet atqarsa da, iskerligimen, jaýapkershiligi, adamgershiligi jáne parasattylyq qasıetterimen tanyldy. Sonyń nátıjesinde, Májilis jumysyn joǵary deńgeıde uıymdastyryp, halqymyzǵa qajetti mańyzdy zańdar qabyldaýǵa zor yqpal etti», - dep atap ótti. Oral Baıqonysuly 65 jasqa qaraǵan shaǵynda dúnıeden ozdy. Ol 1948 jyldyń 11 qarashasynda Qostanaı qalasynda dúnıege kelgen. Almaty joǵarǵy partııa mektebin bitirgen saıasattanýshy QR Parlament Májilisiniń 3-4-shaqyrylymdarynyń tóraǵasy boldy. Oǵan deıin el Úkimetine, QR Prezıdentiniń ákimshiliginde túrli qyzmet atqardy. Sońǵy qyzmeti - QR Parlament Májilisiniń depýtaty. Abzal azamattyń kózin kórip, birge qyzmettes bolǵandar onyń el úshin atqarǵan ıgi isterin iltıpatpen eske aldy.
"Osyndaıda qazaq halqy «Beınesi jarqyn, keýdesi nurly jannyń janary óshse de, jaqsy isi bitpeıdi, jaryǵy óshpeıdi» degen. Oral Baıqonysulynyń esimi el esinde, urpaqtar jadynda, zııaly-zııatker, kórnekti qaıratker retinde máńgi saqtalady. Marqumnyń jatqan jeri jaryq, topyraǵy torqa bolsyn!" - dedi I. Tasmaǵambetov.
