Alash jolyn halyqaralyq deńgeıde zerdeleı túsýdiń mańyzy zor - Májilis depýtaty
Saýal barysynda depýtat bıyl «Alashorda» úkimeti men «Alash» partııasynyń qurylǵanyna 100 jyl tolýyna arnalǵan mereıtoılyq is-sharalar ótkizilip jatqanyn eske saldy. "Kezinde Alash qalasy atanǵan Semeıde Álıhan Bókeıhanǵa eńseli eskertkish ornatyldy, Astanada Alash kóseminiń esimi úlken dańǵyldardyń birine berildi, Batys Qazaqstanda Alash murajaıy ashyldy. Qoryta aıtqanda, Alash murasyn, onyń arystaryn ulyqtaýda qoǵamdyq uıymdar men memlekettik organdar uıymdasa otyryp birshama sharalar atqarýda. Biraq, Alashtyń mańyzdylyǵy bıylǵy júz jyldyqty atap ótýmen ǵana shektelmeıdi. Alashtyń máni men qudireti - ulttyń rýhy men elimizdiń qanyna sińgen temirqazyqtaı bıik te berik uǵym»,- dep toqtaldy depýtat.
Berik Dúısenbınovtiń paıymynsha, Alash jolyn elimizde de, halyqaralyq deńgeıde de zerdeleı túsýdiń, Alash ıdeıalaryn, ásirese jas urpaqqa taratýdyń mańyzy zor. Qazaqstannyń azattyǵy jolyna bar ómirin arnap, sanaly túrde qurbandyqqa barǵan Alash arystarynyń máńgi óshpes isteriniń qundylyǵy júz jylda bir atalyp ótetin shara bolyp qalmaýy kerek.
Osy oraıda depýtat 2018 jyly Maǵjan Jumabaevtyń týǵanyna 125 jyl tolatynyn aıta kele, Alashtyń 100 jyldyq mereıtoıy kelesi jyly Maǵjan oqýlarymen jalǵasyn tapsa degen usynysyn jetkizdi. «Mádenıet mınıstrligine joldaımyz. Maǵjan oqýlary aldaǵy jyly búkil respýblıka aýmaǵynda ótkizilip, al onyń qorytyndysy Maǵjan Jumabaevtyń týǵan ólkesi Qyzyljarda ( Petropavl) jasalǵany jón. Al bolashaqta Maǵjan oqýlary ataýly datalarda ǵana emes, jyl saıyn turaqty ótkizilip tursa nur ústine nur bolar edi. Elbasymyzdyń «Bolashaqqa baǵdar: rýhanı jańǵyrý» baǵdarlamalyq maqalasynyń basty baǵytyna saı keletin bul usynysymyzdy Mádenıet jáne sport mınıstrligi qoldap, qolǵa alýyn suraımyz», - dedi depýtat.
Foto:parlam.kz
