«Alash jolymen...» ekspedıtsııasy Jympıtydan Semeıge attandy

ORAL. QazAqparat - Alashordanyń 100 jyldyǵyna oraı «Alash jolymen...» tarıhı-tanymdyq ekspedıtsııasy Syrym aýdanynyń ortalyǵy Jympıtydan Semeı qalasyna attandy. Bul týraly búgin «Qazaqstan» Ulttyq telearnasynyń óńirlik fılıaldary arasynda uıymdastyrylǵan «Azattyqty ańsaǵan Alashorda» atty telekópir aıasynda málim boldy, dep habarlaıdy «QazAqparat» tilshisi.

1918-1920 jyldary Jympıty aýylynda Alashorda úkimetiniń Batys bólimshesi jumys jasaǵany málim.  Sondyqtan Jympıty men Semeıdi baılanystyrǵan telekópir barysynda BQO ákiminiń orynbasary Marat Toqjanov, ólketanýshy Jaısań Aqbaı, alashtanýshy Dámetken Súleımenova, tarıhshy-ǵalymdar Samat Qurmanalın, Baqtyly Boranbaeva, Alfııa Baıbolsynova, Esqaırat Haıdarov jáne basqalar Abaı elindegi áriptesterimen Alashorda úkimetiniń qazaq tarıhyndaǵy orny, Alash qaıratkerleriniń ómiri men qyzmetin áli de tereńirek zertteý, qundy derekterdi ǵylymı aınalymǵa qosý týraly pikir alysty.
 

Syrym aýdany ákiminiń orynbasary Aslanbek Sarqulovtyń aıtýynsha, «Alash jolymen...» ekspedıtsııasy quramynda Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń aǵa oqytýshysy, tarıh ǵylymdarynyń kandıdaty Esqaırat Haıdarov, Syrym aýdanynan zııaly qaýym ókilderi, mektep muǵalimderi bar. Olar poıyzben Aqtóbe, Astana arqyly Semeı qalasyna barady. Sol qalalardaǵy mýzeılerde, Alashordaǵa qatysty tarıhı jerlerde bolyp, kezdesýler ótkizip, derekter jınaqtaıdy. Ekspedıtsııa 24 mamyrda keri oralady.
 

«Alashorda úkimetiniń 100, Jahansha Dosmuhamedovtiń 130 jyldyǵyna arnalǵan sharalar budan keıin de jalǵasady. Mysaly, maýsym aıynda Máskeýdegi Jahansha jerlengen zıratqa baryp, qabirinen bir ýys topyraq ákelý josparlanýda. Sodan keıin shildede respýblıkalyq deńgeıde ǵylymı-tájirıbelik konferentsııa uıymdastyrylyp, Jahanshaǵa músin ornatylmaqshy», dedi «QazAqparat» tilshisine A.Sarqulov.