Alash Pride tóreshilerdiń sheshimine qarsylyqtaryn jetkizdi
ASTANA. QazAqparat - Alash Pride FC klýbynyń basshylyǵy qazaqstandyq Arman Ospanov (8-2) pen reseılik Alekseı Polpýdnıkov (25-4-1) jekpe-jegindegi tóreshiler sheshimimine qarsy ekenderin jetkizdi, dep habarlaıdy QazAqparat.
Bul týraly Alash Pride FC klýbynyń Instagramdaǵy paraqshasynda aıtyldy.
«Qurmetti, jankúıerler! Bizdiń komanda da tóreshiler sheshimimen kelispeıdi. Onymen ASV prezıdenti Maırbek Hasıev te kelispeıtinin aıtty. Sebebi, Arman densaýlyǵynyń nasharlaǵanyna qaramastan, osy jekpe-jekke shyǵyp, óte nátıjeli urys júrgizdi. Qarsylasyn birneshe ret teıkdaýnǵa túsirip, birneshe ret nokdaýnǵa jiberip, aıqyn basymdyqpen jeńdi. Alaıda, tóreshiler biz ǵana emes, arenadaǵy myńdaǵan kórermen, mıllıondaǵan telekórermender kútpegen sheshim shyǵardy. Qazirgi ýaqytta Máskeýdegi bizdiń basshylyq ASV basshylyǵymen Arman Ospanov-Alekseı Polpýdnıkov jekpe-jegine qatysty suraý salyp jatyr. Nátıjesin keıin habarlaıtyn bolamyz!», - dep delingen habarlamada.
