«ALASH PRIDE-ACB»: Qazaqstandyq faıter «SAQ» AQSh sportshysyn nokaýtpen jeńdi
ALMATY. QazAqparat - Almatyda ótip jatqan «ALASH PRIDE-ACB» halyqaralyq MMA týrnırinde 94 keli salmaqta jekpe-jekke shyqqan qazaqstandyq faıter Asyljan Bahytjanuly («SAQ») AQSh sportshysy Djared Torgesondy tehnıkalyq nokaýtpen jeńdi, dep habarlaıdy QazAqparat tilshisi.
Onyń aldyndaǵy jekpe-jekte 70 keli salmaq dárejesi boıynsha taǵy bir AQSh sportshysy Alonzo Martınesti reseılik Rahman Mahajıev tize búktirgen bolatyn.
Qaıtalaı keteıik, búgin erejesiz aralas jepke-jek keshinde qazaqstandyq faıter Qarshyǵa Dáýitbek tájikstandyq Emomolıı Halboıdi birden nokaýtqa jibergen bolatyn. Alaıda, qazaqstandyq sportshymyz Oljas Esqaraev 70 keli salmaq dárejesindegi qyrǵyz eliniń faıteri Almanbek Janybekovten jeńilip qaldy. «Almata arenadaǵy» kórermen otandasymyzdyń bul sátsizdigine kýá bolǵanymen, 57 keli salmaq dárejesinde jekpe-jekke shyqqan reseılik Ibragım Mamaevti qazaqstandyq Asý Almabaev jeńip, kók týdy jelbiretti.
Aıta keteıik, jekpe-jek keshinde birinshi bolyp alańǵa Tájikstan sportshysy Ramazon Nazorov pen qazaqstandyq Bahtııar Nesipbek shyqqan bolatyn. Shyǵa salysymen qazaqstandyq sportshy 34 sekýnd ishinde qarsylasyn tehnıkalyq nokaýtpen jeńdi.
Shara Almaty qalasynyń 1001 jyldyǵyna arnalady. Saıystyń basty jekpe-jegi qazaqstandyq Arman Ospanov pen brazılııalyq Tıago Lýıs Sılva arasynda ótedi.
«ALASH PRIDE» promoýterlik kompanııasy «ASV» promoýshenimen birlese, Almaty qalasy ákimdiginiń qoldaýymen Qazaqstan tarıhyndaǵy eń aýqymdy, halyqaralyq MMA týrnırin «ALMATY ARENA» sport kesheninde ótkizip otyr. Saıystyń júrgizýshisi - TMD jáne Reseı boıynsha eń úzdik rıng-júrgizýshisi Aleksandr Zagorskıı.
Bul keshtiń basty jekpe-jegi Arman «SUŃQAR» Ospanov pen brazılııalyq Tıago «MANCHINHA» Lýıs Sılva arasynda ótedi.
Qazaqstannyń eń úzdik faıteri, «Alash Pride FC» sarbazy - Arman Ospanov kásipqoı aralas jekpe-jekte segiz kezdesýge shyǵyp barlyǵynda aıqyn jeńgen. Ol áskerı sambodan QR eńbek sińirgen sport sheberi, qoıan-qoltyq urystan álem jáne TMD chempıony, áskerı sambodan álemniń úsh dúrkin chempıony. Onyń qarsylasy Tıago Lýıs Sılva (12-5) brazılııalyq djıý-djıtsýdan qara belbeýdiń ıegeri jáne «Shooto Brasil» uıymynyń álem chempıony.
Bul MMA týrnıriniń aıasynda belgili qazaqstandyq sportshylar, «Alash Pride FC» ókilderi - Evgenıı Egemberdıev pen legıonerimiz Mýrod Hantýraev jáne Igor Svırıd aıqasqa túspek. Týrnırde segiz buryshqa jalpy 15 jup 11 jekpe-jekke shyǵady. Olar: Reseı, AQSh, Brazılııa, Lıtva, Rýmynııa jáne Tájikstan syndy elderdiń atyshýly faıterleri.
«ALASH PRIDE - ASV» týrnırine belgili amerıkalyq UFC referıi- Djon Makkartı men Herb Dın óziniń ádilqazylar brıgadasymen tóreshilik etedi. UFC-diń úsh dúrkin eks-chempıony Frenk Mır tikeleı efırde atalǵan jekpe-jek keshiniń kommentatory bolmaq.
