«Alash praıdtyń» jetekshisi Arman Ospanovtyń jeńilisine qatysty pikir bildirdi
ALMATY. QazAqparat - Almatyda 9 qyrkúıek kúni ótken «ALASH PRIDE-ACB» halyqaralyq MMA týrnırinde keshtiń basty jekpe-jeginde otandasymyz Arman Ospanov brazılııalyq Tıago Lýıs Sılvadan jeńilgen bolatyn. «ALASH PRIDE» jekpe-jek klýbynyń jetekshisi Danııar Qasqaraýov «QazAqparat» tilshisine qazaqstandyqtyń jeńilisine qatysty pikirin bildirdi.
«Alash praıd» klýbyna, jankúıerlerdiń de janyna batty. Sporttyń aty - sport. Kez kelgen sportshy jeńiledi. Arman jekpe-jekke deıin eki aptada aýrýhanada jatyp shyqqan bolatyn. Jalpy, AQSh-ta, Taılandta, Daǵystanda daıyndaldy. Daǵystannan qyrkúıek aıynyń basynda keleýi kerek edi. Qolyna jara shyǵyp, jarystan 10 kún buryn alyp kelip, Almatyda ota jasattyq. «Antıbıotıkter» áser etken bolýy kerek. Jarysqa 4-5 kún qalǵanda, birinshi jattyǵýǵa shyqqanda ol álsizdik sezgenin aıtty. Biraq «ter shyqqasyn, alýym kerek» dedi. Bul rette qarsylasty baǵalamaýǵa bolmaıtynyn kórip otyrmyz. Bir jaǵynan jarnama jasap qoıǵan soń, halyqty shaqyryp qoıǵasyn bas tarta almadyq. Basty kezdesý bolmaǵanda Armanǵa densaýlyǵyna baılanysty bul jarysqa shyqpaı-aq qoıýǵa da bolatyn edi. Qorytyndysy bylaı bolady dep oılamadyq. Endi ýaqytta sozbaı qarymta kezdesý ótkizý qaldy endi. Qarsylas taktıkasyn jaqsy qoıyp kelgen», - dedi Danııar Qasqaraýov.
«Alash praıd» klýby jetekshisi Arman Ospanov jeńilgennen keıin qansha syıaqy alatynyn aıtty.
«Aıtarym, kez kelgen sportshyny baǵalamaýǵa bolmaıdy. Arman sııaqty reıtıngisi joǵary sportshylar bolashaqta densaýlyǵy jaramaı tursa mindetti túrde saıysqa shyqpaýy kerek. Aqtalý emes. Jeńildik. Endi tezirek jumys jasap, jańa jylǵa deıin sol sportshymen kezdesý uıymdastyrýymyz kerek. Arman Ospanov bul jekpe jekte utqan jaǵdaıda 60 myń AQSh dollaryn alýy kerek bolǵan. Utylǵan jaǵdaıda 30 myń dollar bolady. Brazılııalyq qansha alatynyn bilmedim», - dedi Danııar Qasqaraýov.
Eske sala keteıik, 9 qyrkúıek kúni Almaty qalasynyń 1001 jyldyǵyna oraı «Almaty Arena» sport kesheninde Arman Ospanov pen brazılııalyq Tıago Lýıs Sılva arasynda jekpe -jek ótken bolatyn.
Saıystyń júrgizýshisi TMD jáne Reseı boıynsha eń úzdik rıng-habarlaýshysy Aleksandr Zagorskıı boldy.
Qazaqstannyń eń úzdik faıteri, «Alash Pride FC» sarbazy - Arman Ospanov bul qarsylasyna deıin kásipqoı aralas jekpe-jekte segiz kezdesýge shyǵyp barlyǵynda aıqyn jeńgen. Ol áskerı sambodan QR eńbek sińirgen sport sheberi, qoıan-qoltyq urystan álem jáne TMD chempıony, áskerı sambodan álemniń úsh dúrkin chempıony. Onyń qarsylasy Tıago Lýıs Sılva - brazılııalyq sportshy, djıý-djıtsýdan qara belbeý ıegeri jáne «Shooto Brasil» uıymynyń nusqasy boıynsha álem chempıony.
«ALASH PRIDE - ASV» týrnırine belgili amerıkalyq UFC referıi- Djon Makkartı men Herb Dın óziniń ádilqazylar brıgadasymen tóreshilik etti. UFC-diń úsh dúrkin eks-chempıony Frenk Mır tikeleı efırde atalǵan jekpe-jek keshiniń kommentatory boldy.
