«Alash murasyn ardaq tutqan aqyndar» atty aqyndar aıtysy ótti
Is-shara ári Alash ardaqtylarynyń 100 jyldyq mereıtoıyna oraı uıymdastyryldy, dep habarlaıdy QazAqparat tilshisi.
Aıtystyń ashylý saltanatynda ortalyq dırektory Jánibek Taǵaev aıtystyń urpaq tárbıesine áserin, qoǵamda oryn alǵan keleńsizdikterdi joıýdaǵy mánin áńgimeledi. Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda ótken jyr dodasyna 12 aqyn qatysyp, aıtys kórigin qyzdyrdy. Tartysty da qyzyqty ótken baıqaýda bas júlde otyrarlyq Meıirjan Jaqypqa buıyrdy. Al, birinshi oryndy Saıram aýdanynan kelgen aqyn Jandos Myrzabekov ıelense, ekinshi oryndy Qytaı Halyq Respýblıkasynan kelgen qandasymyz Ardaq Orynbek enshiledi. Úshinshi oryndy shymkenttik Nurǵalı Ánapııaǵa buıyrdy. Budan bólek, ulttyq salt-dástúrdi dáripteýge atsalysqan talapkerlerge ortalyq tarapynan arnaıy Alǵys hattar men aqshalaı syılyqtar tabys etildi.
