«Alash kósemsózi» 10 tomdyǵynyń alǵashqy 4 tomynyń tusaýkeseri ótedi
ASTANA. 22 jeltoqsan. QazAqparat - 24 jeltoqsanda Lev Gýmılev atyndaǵy Eýrazııa ulttyq ýnıversıtetiniń jýrnalıstıka jáne saıasattaný fakýltetinde memlekettik «Mádenı mura» baǵdarlamasy aıasynda jaryq kórgen «Alash kósemsózi» atty 10 tomdyqtyń alǵashqy 4 tomynyń tusaýkeseri ótedi, dep habarlaıdy ýnıversıtettiń baspasóz qyzmeti.
Ol Qazaqstan Respýblıkasy Baılanys jáne aqparat mınıstrligi Aqparat jáne muraǵat komıtetiniń «Ádebıettiń áleýmettik mańyzdy túrlerin basyp shyǵarý» baǵdarlamasy boıynsha jaryq kórdi. Joba jetekshisi jáne jalpy redaktsııasyn basqarǵan - L.N. Gýmılev atyndaǵy Eýrazııa ulttyq ýnıversıteti Jýrnalıstıka máselelerin zertteý ınstıtýtynyń dırektory, professor Namazaly Omashev.
10 tomdyqtyń alǵashqy 4 tomynda buryn esh jerde jarııalanbaǵan «Sholpan» (1, 2 tom), «Jas Túrkistan» (3, 4 tom) jýrnaldarynyń jarııalanymdary tuńǵysh ret kópshilik nazaryna usynylyp otyr. Ár tomnyń kólemi - 22 baspa tabaqtan.
Tusaýkeser rásimin L.N. Gýmılev atyndaǵy Eýrazııa ulttyq ýnıversıtetiniń rektory B. Ábdiraıym ashady. Jıynǵa barlyq respýblıkalyq buqaralyq aqparat quraldarynyń basshylary, arnaıy ókilderi jáne tanymal jýrnalıster shaqyrylady. Sol sııaqty belgili alashtanýshy ǵalymdar: D.Qamzabekuly, T.Jurtbaı, H.Ábjan, t.b. qatysady dep josparlanýda.
«Alash kósemsózi» serııasymen jaryq kórgen 4 tomdyqtyń 2 tomyna Alash qaıratkeri Mustafa Shoqaıdyń bas redaktorlyǵymen 1929-1939 jyldary Frantsııada, Berlınde shyqqan «Jas Túrkistan» jýrnalynda jarııalanǵan ulttyq táýelsizdik, el men jer máselesi, ǵylym-bilim, til týraly jáne t.b. jaıly kósemsózderi engizildi. Osyǵan deıin Mustafa Shoqaıdyń jeke-dara maqalalary ǵana qarastyrylsa, bul tomdardy shyǵarýshylar «Jas Túrkistandaǵy» jarııalanymdardy tutas jaryqqa shyǵarýdy maqsat etti. Jýrnal materıaldary sol kezdegi túrki halqyna ortaq shaǵataı tilinen kırıllıtsaǵa aýdaryldy.
«Jas Túrkistan» - birtutas Túrkistan táýelsizdigi ıdeıasyn kóterip, búkil túrki jurtynyń azattyǵy úshin kúresken basylym. Alash qaıratkerlerimen qatar basqa da túrki jurtyna ortaq tulǵalardyń saıası jáne qalamgerlik izderi osy basylym betterinde saırap jatyr. Al 1922-1923 jyldary Tashkentte jaryq kórgen «Sholpan» jýrnaly Ózbekstannyń memlekettik muraǵattarynan kóshirilip alyndy. Onda arab qarpimen jarııalanǵan materıaldar sol qalpynda kırıllıtsaǵa aýdaryldy. Kitap sońynda búrkenshik esimder kórsetkishi men qazirgi kúni qoldanystan shyǵyp qalǵan sózderdiń balamasy berildi.
«Alash kósemsózi» serııasymen jaryq kórgen bul qundy eńbekterdiń qazaq jýrnalıstıkasymen qatar qoǵamdyq, gýmanıtarlyq ǵylymdar úshin de mańyzy orasan zor.
