Alash kósemderi týraly syr shertetin derekti fılm kórsetiledi
ASTANA. Mamyrdyń 28-i. QazAqparat - Mamyrdyń 31-i - saıası qýǵyn-súrgin qurbandaryn eske alý kúni. Osyǵan oraı osy aıdyń sońǵy kúni Astana qalasyndaǵy Ulttyq akademııalyq kitaphanada «Alashorda» derekti fılminiń astanalyq kórermender úshin alǵash ret kórsetilimi bolady,
dep habarlaıdy QazAqparat.
Bul sharany Ulttyq akademııalyq kitaphana uıymdastyryp otyr.
Sháken Aımanov atyndaǵy «Qazaqfılm» AQ-ynyń shyǵarmashylyq túsirýshiler toby Alash qaıratkerleriniń tarıhı muralary saırap jatqan Orynbor, Sankt-Peterbor, Semeı, Almaty qalalarynda bolyp, «Alashorda» derekti fılmin túsirdi. 2008-2009 jyldary daıyndalǵan bul týyndy Alash kósemderi týraly syr shertedi. Bul týyndyda Alash qozǵalysyna qatysty birneshe tarıhı ǵımarat ta tuńǵysh ret kórermen nazaryna usynylǵan. Fılmniń avtory - belgili kınodokýmentalıst Qalıla Omarov. Tolyqmetrajdy «Alashorda» derekti fılminiń uzaqtyǵy - 52 mınýt.
