Alash qaıratkeri Názir Tórequlovtyń dıplomatııalyq murasy ulyqtaldy
ASTANA. KAZINFORM — Názir Tórequlov atyndaǵy elordalyq №35 mektep-lıtseıinde «Názir ǵumyr – tálim ǵumyr» atty saltanatty jıyn ótti. Іs-shara qazaqtan shyqqan tuńǵysh kásibı dıplomat, Alash qozǵalysynyń ókili jáne KSRO-nyń Saýd Arabııasyndaǵy tuńǵysh elshisi Názir Tórequlovtyń murasyna arnaldy.
Saltanatty jıyn aıasynda qaıratkerdiń ómiri men dıplomatııalyq qyzmetine arnalǵan mýzeıdiń ashylýy jáne mektep aýmaǵynda keýde músininiń tusaýkeser rásimi uıymdastyryldy. Sonymen qatar ǵylymı-praktıkalyq konferentsııa ótkizilip, onyń murasy talqylandy.
QR Syrtqy ister mınıstrligi Halyqaralyq aqparat komıtetiniń tóraǵasy Erlan Jetibaev jınalǵan qaýymǵa syrtqy saıası vedomstvosynyń basshysy Ermek Kósherbaevtyń atynan quttyqtaý hatyn oqyp berdi.
«Názir Tórequlov — memleketshildiktiń bıik deńgeıin kórsetip, halyqaralyq arenada qazaq dıplomatııasynyń irgetasyn qalaǵan aıtýly qaıratker. Onyń parasaty men bilimi, el aldyndaǵy jaýapkershiligi men adamdyq aryna adaldaǵy — búgin jas urpaq úshin naǵyz otansúıgishtiktiń jarqyn úlgisi», — delingen mınıstrdiń quttyqtaýynda.
Іs-sharaǵa memlekettik organdar men dıplomatııalyq korpýs ókilderi, ǵalymdar, dıplomatııalyq qyzmet ardagerleri men qaıratkerdiń urpaqtary qatysty. Qonaqtar Túrkistan mýzeıi uıymdastyrǵan «Ult rýhyn kótergen tulǵa: Názir Tórequlov» atty kóshpeli kórmeni tamashalady.
Uıymdastyrýshylardyń — Nazıra Tórequlov atyndaǵy Halyqaralyq qaıyrymdylyq qory ókilderiniń aıtýynsha, bul is-shara jas urpaqqa ulttyq múddelerdi qorǵaýdyń shynaıy úlgisin kórsetýge jáne otandyq dıplomatııa tarıhyn tereńirek túsinýge biregeı múmkindik berdi.
Eske sala keteıik, buǵan deıin sý dıplomatııasy Aral teńizin toltyrýǵa kómekteskenin jazdyq.